Հայաստանի քաղաքական դաշտում կան ազդեցության գործակալներ. Նիկոլ Փաշինյան. ՏԵՍԱՆՅՈՒԹ

Այն խնդիրները, որոնք կապված են մեր երկրի անվտանգության հետ, ԱԱԾ-ի հսկողության ներքո են, և երբ որոշ գործեր կհասունանան այնքան, որ այլ փուլ կմտնեն, հանրությունը տեղեկատվություն կստանա: Այսօր հրավիրված ասուլիսում այս մասին ասաց ՀՀ վարչապետ Նիկոլ Փաշինյանը:

Նա հիշեցրեց դեռևս 2015 թվականին արված իր մի հայտարարություն. «Ես ասել եմ դեռևս 2015 թվականի սեպտեմբերի 10-ին Երևանի Ազատության հրապարակում տեղի ունեցած հանրահավաքում, որ Հայաստանի Հանրապետությունից, որպես կատեգորիա, պետք է արմատախիլ արվի, ասենք, արևմտամետությունը, ամերիկամետությունը, ռուսամետությունը, և նաև պետք է արմատախիլ արվի հակառուսությունը, հակաեվրոպականությունը… մենք պետք է լինենք պրոհայկական դիրքերի վրա»,- ասաց նա:

Հարցին, թե փետրվարին Իրանում հայ համայնքի հետ հանդիպման ժամանակ ասելով՝ «պետք է թույլ չտանք, որ ՀՀ-ում գործեն քաղաքական գործիչներ, որոնք ավելի շատ օտարերկրյա գործակալներ են, քան ՀՀ քաղաքացիներ», ո՞ւմ նկատի ուներ, Նիկոլ Փաշինյանը պատասխանեց. «Գործակալներ ասելով՝ կա նաև «ազդեցության գործակալներ» հասկացությունը: Եվ կարծում եմ, որ շատ մեծ գաղտնիք էլ չի, որ Հայաստանի քաղաքական դաշտում եղել են և կան մարդիկ, ում գործունեությունը կարելի է որակել որպես ազդեցության գործակալ: Նաև այդպիսին եմ համարում բոլոր այն մարդկանց, ովքեր Հայաստանում որևէ հարց լուծելու համար նույնիսկ գործողություններ են ձեռնարկում՝ օտարերկրյա աջակցություն ստանալու համար: Դրա դրսևորումները երբեմն շատ հրապարակային են, այնպես որ՝ այն, ինչ ես տեսնում եմ, դուք էլ կարող եք տեսնել»:

Մանրամասները՝ տեսանյութում:

Ռոբերտ Անանյան