16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Օրերս մայրաքաղաքում այրվեց հուսահատության գազելներից մեկը. Դավիթ Խաժակյան. ՏԵՍԱՆՅՈՒԹ
Տեսանյութեր
08.05.2019 | 11:35
Երևանի քաղաքապետարանի ավագանու այսօրվա արտահերթ նիստին «Լույս» խմբակցության ղեկավար Դավիթ Խաժակյանը քաղաքապետին հիշեցրեց վարչապետ Նիկոլ Փաշինյանի՝ 2017 թվականի ելույթներից մեկը՝ որպես Երևանի քաղաքապետի թեկնածու։
«Երկու տարի առաջ ես և իմ խմբակցության անդամներն այդ թիմի մասն էինք և կանգնած էինք Երևանին նոր շունչ ու թարմություն հաղորդող, և ոչ թե քանդող ու քաղաքական հակակրանքներ կիրառող քաղաքապետի թեկնածուի կողքին։ Երկու տարի առաջ այս շրջանն էր, երբ մենք շրջում էինք բակերով և ասում, որ հուսահատության գազելներից, մահվան վերելակներից, աղբի և փոշու կույտերից ելք կա։ Մեկ տարի և չորս ամիս անց Դուք և Ձեր քաղաքական թիմի առաջնորդ Նիկոլ Փաշինյանը հայտարարեցիք, որ սրանք ընտրություններ են սևի և սպիտակի միջև, և որ քվեարկելով ձեր օգտին՝ քաղաքացիները քվեարկում են խորհրդարանի արձակման և հեղափոխության վերջնական կայացման օգտին»,- նշեց Խաժակյանը։
Ըստ նրա՝ հեղափոխության կայացումից հետո տրված խոստումների առնվազն 80%-ն արդեն իրագործված պետք է լիներ։
«Հանրային տրանսպորտի վիճակն ավելի է վատացել։ Օրեր առաջ մայրաքաղաքում այրվեց հուսահատության գազելներից մեկը»,- նշեց «Լույս» խմբակցության ղեկավարը։
Խաժակյանի խոսքով՝ քաղաքացիները մտահոգված են, թե ինչպե՞ս է քաղաքապետի աշխատավարձի բարձրացումը նպաստելու հանրային տրանսպորտի և մյուս խնդիրների լուծմանը։
«Մենք թերթում ենք Ձեր պաշտոնավարման 8-րդ ամիսը և քմծիծաղով հիշում մահվան վերելակների փոխարինման աշխարհացունց սխեման»,- ասաց Դավիթ Խաժակյանը՝ հավելելով, որ քաղաքապետը մայրաքաղաքի կառավարումն իրականացնում է՝ հիմնվելով սեփական համակրանքերի ու հակակրանքների վրա:
Մանրամասները՝ տեսանյութում:
Լիլիթ Շաբոյան
