16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Ruhr24. Մխիթարյանն այն ֆուտբոլիստը չէ, որը պետք է Բորուսիային
07.05.2019 | 22:22
Այսօր մամուլում տեղեկատվություն տարածվեց, որ Հայաստանի ազգային հավաքականի և «Արսենալի» կիսապաշտպան Հենրիխ Մխիթարյանի գործակալ Մինո Ռայոլան մտադիր է կազմակերպել հայ ֆուտբոլիստի վերադարձը Դորտմունդի «Բորուսսիա». գրում է armsport.am-ը:
Իտալական Tuttomercatoweb-ի «Սա լինելու է Մինոյի ամառը» հոդվածում նշվում է, որ Ռայոլան սկսել է իր հաճախորդների տրանսֆերների վերաբերյալ աշխատանքները և դիտարկում է Մխիթարյանին «Սիգնալ Իդունա Պարկ» վերադարձնելու տարբերակը:
Գերմանական հեղինակավոր Ruhr24.de պարբերականն առանձին հրապարակմամբ անդրադարձել է այդ տեղեկատվությանը: Հոդվածագիր Դենիս Լիեդշուլտեն գրում է.
««Բորուսիան» իսկապե՞ս կարող է հետաքրքրվել Մխիթարյանին վերադարձնելու տարբերակով: Յուրգեն Կլոպը մի առիթով ասել է. «Հաղթելու ցանկությունը պետք է ավելի ուժեղ լինի, քան կորցնելու վախը»: Եթե «Բորուսիան» նոր մրցաշրջանում կողմ լինի նման մտքին, ապա Մխիթարյանի տարբերակը հաստատ առաջնային չի լինի, քանի որ «Բորուսիայի» երկրպագուները հաստատ հիշում են 2016 թվականի Գավաթի խաղարկության եզրափակիչը:
Հանս-Յոահիմ Վացկեն վերադարձել է Նուրի Շահինին, Սինձի Կագավային, Մարիո Գյոտցեին: Սակայն Հենրիխ Մխիթարյանը չի վերադառնա «Բորուսիա», եթե ամեն ինչ լավ լինի: 2013-2016 թվականներին հայ ֆուտբոլիստը խաղաց «Բորուսիայի» մարզահագուստով և հիասթափեցրեց երեք մրցաշրջաններից երկուսում: 2014-15թթ. մրցաշրջանում նա խորհրդանշում էր այն ամենը, ինչ «Բորուսիայի» մոտ չէր ստացվում:
Մխիթարյանը սկսեց լավ խաղալ Թոմաս Տուխելի գլխավորությամբ: Նա 11 գոլի և 20 գոլային փոխանցման հեղինակ դարձավ, սակայն «Բորուսիայի» երկրպագուների առջև 2 սցենար կա: «Բավարիայի» հետ գավաթային եզրափակչում Մխիթարյանը հրաժարվեց պատասխանատվությունից: Պատճառը՝ նա շատ հոգնած էր: Արդյունքը հայտնի է…
Տուխելը ցանկանում էր պահել հայ ֆուտբոլիստին, ինչը զարմանալի չէր, քանի որ 11 գոլն ու 20 գոլային փոխանցումը սենսացիա էին առաջացրել: Սակայն Մխիթարյանի գործակալը նրա տրանսֆերն առաջարկեց Պրեմիեր լիգայի ակումբներին: Մխիթարյանը միացավ «Մանչեսթեր Յունայթեդին», իսկ 2018-ին տեղափոխվեց «Արսենալ»: Չնայած տեղափոխություններին՝ հայ ֆուտբոլիստը չի տպավորել վերջին 3 տարիներին: «Արսենալն» ամռանը փոփոխություններ է ծրագրում, իսկ 30-ամյա ֆուտբոլիստը տեղափոխվողների ցանկում է:
Դեռ Շահինի, Կագավայի, Գյոտցեի վերադարձի ժամանակ «Բորուսիայի» ոչ բոլոր երկրպագուներն էին ուրախ: Մխիթարյանի և այս ֆուտբոլիստների միջև տարբերություն կա: Ի տարբերություն հայ ֆուտբոլիստի՝ Գյոտցեն և Շահինը «Բորուսիայում» անցյալ ունեին, իսկ Կագավան՝ առանձնահատուկ պահեր:
Ինչպես հայտնի է, Ռայոլան իր հաճախորդներին ամռանն ինչ-որ ակումբներում տեղավորելու համար աշխատանքները սկսում է գարնանը: «Բորուսիայի» երկրպագուները երջանիկ կլինեն, եթե Հանս-Յոահիմ Վացկեն անտեսի Ռայոլային և կենտրոնանա ավելի հեռանկարային ֆուտբոլիստների՝ Տորգան Ազարի, Նիկո Շուլցի, Յուլիան Բրանդտի վրա:
Սոցիալական ցանցերի տարբեր խմբերում երկրպագուներն ակնհայտորեն դեմ են Մխիթարյանի վերադարձին: Շատերն ասում են, որ նա շատ լավ ֆուտբոլիստ է: Համենայն դեպս, Մխիթարյանը «վատ բնավորություն» ունի և այն ֆուտբոլիստը չէ, որը պետք է «Բորուսիային»»,- հրապարակման ավարտ:
