Օպերայի անձնակազմը վարչապետի հետ ևս մեկ հանդիպում է պահանջում

Մեր նպատակն է՝ վարչապետին տեղեկացնել ճշմարտության մասին և օգնել նրան՝ ճիշտ օրենքով առաջնորդվել, նրան հասած տեղեկությունների մեծ մասը չի համապատասխանում իրականությանը: Այս մասին այսօր Օպերային թատրոնում հրավիրված ասուլիսի ժամանակ նշեց դիրիժոր Հարություն Արզումանյանը։

«Պետք է վարչապետին ճիշտ տեղեկատվություն ներկայացնել, որ նա ստիպված չլինի եթերում սխալ տեղեկատվություն կարդալ: Սա խայտառակություն է: Վարչապետին ներկայացված փաստաթղթում խոսվում է 92 մլն դրամի խախտումների վերաբերյալ, մինչդեռ դրանք վերաբերում են 2014-16 թվականներին, երբ Օրբելյանն այդ ժամանակ դեռ ղեկավար չէր»,- նշեց դիրիժորը։

Ալ.Սպենդիարյանի անվան օպերայի և բալետի ազգային ակադեմիական թատրոնի երիտասարդական ծրագրի ղեկավար Լևոն Ջավադյանն էլ նշեց, որ թեպետ վարչապետի հետ հանդիպումից մեկ ամիս է անցել, անհանգիստ են, քանի որ ոչ մի պատասխան չեն ստացել: «Երեկ նամակ ենք ուղարկել վարչապետ Նիկոլ Փաշինյանին՝ դարձյալ հանդիպելու խնդրանքով»,- ասաց Ջավադյանը։

Հիշեցնենք, որ շուրջ մեկ ամիս առաջ Մշակույթի նախարարի պարտականությունները կատարող Նազենի Ղարիբյանի հրամանով Կոնստանտին Օրբելյանն ազատվել էր Ալ.Սպենդիարյանի անվան օպերայի և թատրոնի ակադեմիական թատրոնի տնօրենի պաշտոնից: Ի նշան բողոքի՝ Օպերային թատրոնի աշխատակիցները Կառավարության դիմաց բողոքի ակցիա էին կազմակերպել և հանդիպում պահանջել վարչապետ Փաշինյանի հետ։ Հանդիպումից հետո Նիկոլ Փաշինյանը հանձնարարել էր Կոնստանտին Օրբելյանին թատրոնի տնօրենի պաշտոնից ազատելու հարցով Մշակույթի նախարարության ներկայացրած փաստարկների վերաբերյալ հակափաստարկներ ներկայացնել:
Բացի այդ՝ պայմանավորվածություն էր ձեռք բերվել, որ թատրոնի տնօրենի պարտականությունները ժամանակավորապես պետք է կատարի թատրոնի փոխտնօրեն Կարինե Կիրակոսյանը:

Նելլի Մելքոնյան