Բողոքի ակցիա Վանաձորում՝ ընդդեմ գազի գնի ու որակի. ՏԵՍԱՆՅՈՒԹ

Այսօր Վանաձորում բողոքի ակցիա էին իրականացնում վարորդները: Ավելի քան 40 վարորդներ, որոնք հավաքվել էին Հայքի հրապարակում, դժգոհում էին վերջին օրերին գազալցակայաններում վաճառվող գազի գնից և որակից: Նրանց խոսքով մայիսի 1-ից կիլոգրամով անցնելուց հետո՝ վճարում են ավելի շատ, փոխարենը ստանում ավելի քիչ:

«Մի լիցքավորման մեջ մինչև 400 դրամի տարբերություն է տալիս: Համեմատած առաջվա գնի հետ, կգ-ի դեպքում ամենաշատը պետք է լիներ 260 դրամ, բայց 290 դրամ է: Առաջին օրը 260 եղավ, հետո միանգամից բարձրացրին, բայց թե ինչի՞ համար, ոչ մեկը չգիտի»,- ասում է վարորդ Կարեն Կիրակոսյանը:

Վարորդներից Արթուրն էլ նշում է, որ թանկացել է ոչ միայն գազը, այլև բենզինը: Վստահ է՝ խնդրին միայն վարչապետ Նիկոլ Փաշինյանը կարող է լուծում տալ. «Բենզինն էլ են թանկացրել, չորս հարյուր քանի դրամ են դարձրել, էդ ինչի՞ պետք է թանկանա: Նիկոլ Փաշինյանը հնարավորություն ունի գազալցակայանի տիրոջն ասի՝ գնա ստեղից, գազի գինն էլ դիր 150 դրամ: Դուք հենց գիտեք, թե Նիկոլ Փաշինյանը չգիտի՞ էս մասին, լավ էլ գիտի, տեղյակ է»:

Հավաքված վարորդներն իրենց ակցիայով փորձեցին հրավիրել պատկան մարմինների ուշադրությունը՝ պահանջելով, որ իրենց հետ հանդիպեն Լոռու մարզպետ Անդրեյ Ղուկասյանն ու Վանաձորի քաղաքապետ Մամիկոն Ասլանյանը:

Ակցիայի մասնակիցներին տեղեկացրին, որ մարզի ղեկավարը տեղում չէ, մարզպետարանից այլ ներկայացուցիչ եկավ: Վարորդների հետ հանդիպեց նաև քաղաքապետը: Լսելով վարորդների դժգոհությունը՝ Ասլանյանն ասաց, որ խնդրի մասին կտեղեկացնի պատասխանատու մարմիններին. «Մարզպետի հետ կխորհրդակցենք, կդիմենք կառավարության համապատասխան տնտեսական հանձնաժողովներին: Նաև «Գազպրոմի» ու տեխնիկական մասի հետ հասկանանք, թե խնդիրն ինչումն է, որպեսզի այս մարդկանց կարողանանք բացատրել, թե գնային խնդիրը որտեղից է գալիս, քիչ կիլոմետրաժինը՝ որտեղից: Գազի ՕԳԳ-ն ինձ հուզեց, որովհետև որքան հասկացա, եթե իրենց բացատրածը ճիշտ է, պետք է այսօր էլ 1000 դրամի լցնեն ու նույն չափի քշեն, բայց փաստորեն հակառակն է ստացվում»:

Մանրամասները՝ տեսանյութում:

Տաթևիկ Ղազարյան

Բ