Սուպերվարչապետական աթոռներին կառչած չենք, չհամեմատեք նախկինում այս դահլիճում նստած որոշ մարդկանց հետ․ Ալեն Սիմոնյան․ ՏԵՍԱՆՅՈՒԹ

Հայաստանում այո՛, նապոլեոններ ու թագավորներ չկան, տիկին Զոհրաբյան, ես հասկանում եմ՝ Ձեր փորձը հիմնված է նախկին Հայաստանում կատարվածի վրա, սակայն վստահեցնում  եմ, որ և՛ Արայիկ Հարությունյանը, և՛ Սուրեն Պապիկյանը արհեստավարժ մասնագետներ են և կարող են միացված նախարարությունների նախարարներ աշխատել և գալ խորհրդարանում ելույթներ ունենալ։

Այսօր խորհրդարանում Կառավարության կառուցվածքի փոփոխության մասին նախագծի քննարկման ժամանակ, անդրադառնալով  ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանի այն քննադատությանը, որ մի նախարարը չի կարող համակարգել մի քանի նախարարություններ և գալ ԱԺ-ում մի քանի ոլորտների վերաբերյալ ելույթներ ունենալ, ասաց ԱԺ փոխնախագահ Ալեն Սիմոնյանը։

Վերջինս անդրադարձավ նաև «Լուսավոր Հայաստան» խմբակցության պատգամավոր Անի Սամսոնյանի այն դիտարկմանը, որ «Իմ քայլը» խմբակցության պատգամավորները չեն հաղթահարել իրենց առաջ դրված փորձությունը։

«Տիկին Սամսոնյան, ներեցեք, այստեղ մարդ չկա, որ պետք է Ձեզ մոտ փորձություն անցնի, այստեղ փորձություն մարդիկ անցնում են ՀՀ քաղաքացիների մոտ, և այն մենք շատ լավ ենք անցել»,- ասաց ԱԺ փոխնախագահը։

Խոսելով  սուպերվարչապետական համակարգի մասին՝ Սիմոնյանը նկատեց, որ այն տեսքով, որով այժմ այդ համակարգը գոյություն ունի, երկար չի մնալու և փոփոխության է ենթարկվելու, ինչպես այդ մասին հայտնել է վարչապետը։

«Մեզ և ձեզ չհամեմատեք նախկինում այս դահլիճում նստած որոշ մարդկանց հետ։ Մեզանից որևիցե մեկը այդ սուպերվարչապետական աթոռներին կառչած չէ․ մեր անցած ճանապարհով և այսօրվա գործունեությամբ բազմիցս ապացուցել ենք և կապացուցենք նաև ապագայում»,-ասաց  Սիմոնյանը։

Մանրամասները՝ տեսանյութում։