08.10.2026 | 17:26
Sportico. Աշխարհի ամենաբարձր վարձատրությամբ ֆուտբոլիստները
Թուրք-ադրբեջանական ակտիվ զորավարժությունների պատճառը Հայաստանի կողմից Սու-30 կործանիչների գնումն է. Ալեքսանդր Իսկանդարյան
Քաղաքականություն
03.05.2019 | 18:00
Ադրբեջանում անցկացվող թուրք-ադրբեջանական զորավարժությունները նորություն չեն, դրանք պարբերաբար անցկացվում են, իսկ դրանց Թուրքիայի մասնակցության նպատակն ադրբեջանցի զինվորականներին ուսուցանելն է: Մայիսի 3-ին լրագրողների հետ հանդիպմանը նման կարծիք հայտնեց քաղաքագետ Ալեքսանդր Իսկանդարյանը:
Նրա խոսքով՝ այս օրերին անցկացվող հերթական համատեղ զորավարժություններում զինտեխնիկայի բավական լայն տեսականի է ընդգրկված, սակայն այդ մասին դատողություն հնարավոր է անել միայն տարածվող լուսանկարներից և տեսանյութերից, տեղեկություններն այդ մասին քիչ են:
«Դատելով այն բանից, որ վերջին երկու վարժանքների ժամանակ նրանք փորձարկում են հակաօդային պաշտպանության համակարգեր՝ և՛ ավիացիայի, և՛ ցամաքային միջոցների օգնությամբ, կարելի է ենթադրել, որ դրանց պատճառը Հայաստանի կողմից Սու-30 կործանիչների գնումն է: Ադրբեջանցիները փորձում են միջոցներ ձեռնարկել՝ պաշտպանություն ապահովելու համար»,- ասաց Ալեքսանդր Իսկանդարյանը:
Ինչ վերաբերում է Նախիջևանում Թուրքիայի ակտիվացմանն ու այնտեղ ռազմաբազա տեղակայելու մասին լուրերին, քաղաքագետը դա, գոնե հիմա, քիչ հավանական է համարում:
Անդրադառնալով հայ-ռուսական հարաբերություններին՝ Ալեքսանդր Իսկանդարյանը հիշեցրեց, որ բարձր մակարդակով հայ-ռուսական փոխգործակցությունը բավական ինտենսիվ կերպով է ընթանում. «Կարծում եմ՝ այս ընթացքում եղել են խնդիրներ, սխալներ են արվել, բայց կողմերը փորձում են հաղթահարել դրանք: Այս ամենից ելնելով՝ կարելի է եզրակացնել, որ այն խնդիրները, որոնք գոյություն ունեն, մարտավարական են: Իսկ ռազմավարական առումով և՛ Ռուսաստանը, և՛ Հայաստանը կարծում են, որ պետք է հարաբերությունների ձևաչափ մշակել»:
Ըստ նրա՝ նախկինում շփման ավանդույթ կար, Սերժ Սարգսյանը, որ միայն 10 տարի նախագահ է եղել, դրանից առաջ էլ բարձր պաշտոններ է զբաղեցրել, այսինքն՝ անձ էր, որը Ռուսաստանի հետ փոխգործակցության որոշակի ձևաչափ էր. «Մշտական հանդիպումներ էին տեղի ունենում, միմյանց գիտեին, հասկանալի էր՝ ինչպես փոխգործակցել: Ի դեպ՝ միֆ է տարածված կարծիքը, որ Սերժ Սարգսյանն ու Վլադիմիր Պուտինը հրաշալի անձնական հարաբերություններ ունեին: Այդպես չէ: Չնայած դրան՝ ձևավորված մեթոդաբանություն կար, իսկ հիմա չկա»:
Ալեքսանդր Իսկանդարյանի խոսքով՝ հիմա Հայաստանում իշխանության են եկել նոր մարդիկ, ընդ որում՝ ընդդիմությունից, որոնք մինչ այդ միասին չեն աշխատել, չեն գործակցել, և հիմա փորձում են ձևաչափ մշակել:
