Հայաստանը մասնակցել է Թեհրանի գրքի միջազգային ցուցահանդեսին

ՀՀ մշակույթի նախարարությունից տեղեկացնում են, որ  ապրիլի 24-28-ը Հայաստանը մասնակցել է Թեհրանի գրքի միջազգային ցուցահանդեսին:

«Ապրիլի 25-ին Թեհրանի ցուցահանդեսի հատուկ միջոցառումների սրահում տեղի է ունեցել Ալեքսանդր Թոփչյանի «Բանկ Օտոման» վեպի պարսկերեն թարգմանության շնորհանդեսը: Գիրքը պատմում է հայ հեղափոխականների մասին, որոնք պատրաստվում են իրականացնել նշանավոր «Բանկ Օտոման» գործողությունը:

Ապրիլի 26-ին Թեհրանի «Ռամ» արտ սրճարանում տեղի է ունեցել Վահե Արմենի «Կռունկների թռիչքից հետո» հայերեն և պարսկերեն բանաստեղծությունների ժողովածուների շնորհանդեսը: Հայերեն ժողովածուն 2018 թվականին մշակույթի նախարարության աջակցությամբ հրատարակվել է «Աջակցություն գրականության հրատարակմանը» ծրագրի «Հայազգի օտարագիր գրողներ» ուղղությամբ:

Թեհրանի գրքի միջազգային ցուցահանդեսում հայկական տաղավարի աշխատանքներին մեծապես աջակցել են Իրանում ՀՀ դեսպանությունը: Դեսպանության, ՀՀ մշակույթի նախարարության և իրանական հրատարակչությունների համագործակցությամբ, այս տարի Իրանում լույս կտեսնեն հայ ժամանակակից արձակի և պոեզիայի պարսկերեն երկու անթոլոգիաներ:

Հայաստանի պատվիրակության կազմում Թեհրան էին մեկնել ՀՀ մշակույթի նախարարության գրականության հարցերով փորձագետ Արմեն Սարգսյանը և Հայաստանի ազգային գրադարանի Գրականության հանրահռչակման բաժնի պետ Հասմիկ Խեչիկյանը:

Ցուցահանդեսը Միջին Արևելքի և Ասիայի ամենամեծ տոնավաճառներից է: Այստեղ են հա­վաքվում մեծ թվով հրատարակիչներ, գրողներ, ուսանողներ: Այն կարևոր հնարավորություն է մշակույթի նախարարության համար՝ ներկայացնելու «Հայ գրականությունը թարգմանություններում» դրամաշնորհային ծրագիրը, պարսկերեն և այլ օտար լեզունե­րով հրատարակված հայ գրականությունը, կապեր հաստատելու իրանական և օտարերկյա հրատարակչությունների և գրական գործակալների հետ: Ցուցահանդեսին մասնակցությունը կարևոր է նաև երկու երկրների մշակութային համագործակցության ամրապնդման համար»,- ասված է հաղորդագրությունում։