16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Նախկին պատգամավոր Շշի Մելո մականվամբ հայտնի Մելիք Մանուկյանին պատկանող գործարանը 54 մլն դրամի հարկային արտոնություն ստացավ
Տնտեսություն
02.05.2019 | 13:43
Կառավարությունը մայիսի 2-ի նիստում հավանության արժանացրեց որոշման նախագիծ, որով առաջարկվում է արտոնություն տալ «Մանուկյան կոնյակի գործարան» սահմանափակ պատասխանատվությամբ ընկերության կողմից իրականացվող ներդրումային ծրագրին՝ 2019 թվականի մայիսի 15-ից մինչև 2020 թվականի դեկտեմբերի 31-ը ներառյալ ներմուծվող ապրանքների` մաքսային և հարկային մարմինների կողմից հաշվարկվող ավելացված արժեքի հարկի վճարման ժամկետը հետաձգելով ներմուծման հայտարարագրման օրվանից հաշված 3 տարի ժամկետով:
Ընկերությունը 54,6 մլն դրամի հարկային արտոնություն ստացավ։
Ներդրումային ծրագրի շրջանակներում ընկերությունը նախատեսում է Կոտայքի մարզի գյուղ Բալահովտում հիմնել և գործարկել ամբողջությամբ ավտոմատացված, միջազգային չափանիշներին համապատասխանող կոնյակի, գինու և մրգային օղիների գործարան։ Արտադրական փուլը նախատեսվում է սկսել 2020 թվականից։
Ներկայացված ներդրումային ծրագրի շրջանակներում ընկերությունը մտադիր է կատարել ընդհանուր շուրջ 2,8 մլրդ դրամի չափով ներդրում:
Ներդրումային ծրագրի իրագործման արդյունքում ընկերությունում երեք տարվա ընթացքում կստեղծվի 37 նոր աշխատատեղ` 260 հազ․ դրամ միջին աշխատավարձով:
Նշենք, որ «Մանուկյան կոնյակի գործարանը» պատկանում է ՀՀ ԱԺ ԲՀԿ խմբակցության նախկին պատգամավոր, Շշի Մելո մականվամբ հայտնի Մելիք Մանուկյանին։
