Հիմա նույնիսկ ԱԱԾ-ն է թափանցիկ, և սկսել են դա քննարկել, թե ինչ-որ շատ է թափանցիկ․ վարչապետ․ ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցությունը Կառավարության հավանությանն է ներկայացրել օրենսդրական նախաձեռնություն, որով առաջարկվում է «Երևան քաղաքում տեղական ինքնակառավարման մասին» ՀՀ օրենքում փոփոխություն կատարել և վերացնել ավագանու նիստերին մասնակցելու իրավունք ունեցողների համար գոյություն ունեցող սահմանափակումը։

Հարցի զեկուցող Տարածքային կառավարման և զարգացման նախարար Սուրեն Պապիկյանը նշեց, որ առաջարկվող այս փոփոխությունը մերժում են, քանի որ ավագանու նիստերին մասնակցելու և ներկա գտնվելու իրավունք ունեցող անձանց շրջանակի հստակ ամրագրումն ինքնանպատակ չէ, այլ ուղղված է ավագանու նիստի բնականոն ընթացքի ապահովմանը, ինչը կարող է խոչընդոտվել ավագանու նիստերին մասնակցության մուտքը ցանկացած քաղաքացու համար ազատ լինելու դեպքում:

Ըստ նախարարի՝ խմբակցությունն առաջարկել է նաև փոփոխություն կատարել ավագանու մասին օրենքում՝ լրագրողներին թույլատրելով մասնակցել նիստին։

Ըստ Պապիկյանի՝ առաջարկվող  այս փոփոխությունը մասամբ է բավարարվել, քանի որ  լրագրողները ավագանու նիստերին կարող են հետևել դահլիճին կից հարթակից։

Նշենք, որ ԱԺ «Լուսավոր Հայաստան» խմբակցությունը առաջարկել է նաև վերացնել Երևանի քաղաքապետի՝ Երևանի քաղաքապետարանում լրագրողների հավատարմագրման, ինչպես նաև Երևանի տեղական ինքնակառավարման մարմինների նստավայրում մամուլի ասուլիսների, ճեպազրույցների անցկացման կարգերը սահմանելու լիազորությունը, ինչը Կառավարությունը համարում է ընդունելի:

Նախագծի վերաբերյալ վարչապետ Փաշինյանը նշեց, որ Կառավարությունն ու պետական մարմինները որևէ խնդիր չունեն. «Հիմա նույնիսկ ԱԱԾ-ն է թափանցիկ, և սկսել են դա քննարկել, որ ինչ-որ շատ թափանցիկ է»։

Մանրամասները՝ տեսանյութում։