30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Արցախի անկախությունը ճանաչելու համար Ադրբեջանի ԱԳՆ-ն բողոքի նամակ է ուղարկել ամերիկյան Կոլորադոյի Սենատին
Քաղաքականություն
25.04.2019 | 19:19
Ադրբեջանի ԱԳՆ-ն բողոքի նամակ է ուղարկել ամերիկյան Կոլորադո նահանգի Սենատին՝ օրենսդիր այդ մարմնի կողմից ապրիլի 24-ին Հայոց ցեղասպանությունը դատապարտող բանաձևում Արցախի անկախությունը ճանաչելու համար:
«Ապրիլի 24-ին ԱՄՆ Կոլորադո նահանգի Սենատը բանաձև է ընդունել «հայոց ցեղասպանության» հետ կապված: Այդ բանաձևում հղում է արվում Թուրքիայի և Ադրբեջանի կողմից Հայաստանի և, այսպես կոչված, Արցախի շրջափակմանը և նշվում, որ Նախիջևանի ինքնավար հանրապետությունում, իբր, հայկական քրիստոնեական ժառանգության մշակութային ցեղասպանություն է իրականացվել»,- ադրբեջանական Report-ին ասել է այդ երկրի ԱԳՆ մամլո քարտուղար Լեյլա Աբդուլաևան:
Նա նշել է, որ ԱՄՆ-ում Ադրբեջանի դեսպանատունը Կոլորադոյի Սենատի ղեկավարությանն ու անդամներին նամակ է ուղղել՝ կոչ անելով վերացնել Ադրբեջանի նկատմամբ թույլ տրված «լուրջ խեղաթյուրումներն ու սխալ տեղեկությունը»:
Հիշեցնենք, որ ԱՄՆ Կոլորադո նահանգի Ներկայացուցիչների պալատը նախօրեին՝ ապրիլի 24-ին Հայոց ցեղասպանությունը դատապարտող բանաձև է ընդունել, որում առանձին կետով ճանաչել է Արցախի անկախությունը:
