14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
ԲՀԿ-ական պատգամավորները բոյկոտեցին տնտեսական հարցերի մշտական հանձնաժողովի նիստը․ ՏԵՍԱՆՅՈՒԹ
Քաղաքականություն
25.04.2019 | 14:56
Ազգային ժողովի տնտեսական հարցերի մշտական հանձնաժողովի նիստում այսօր քննարկվում է «Պետական տուրքի մասին» ՀՀ օրենքում լրացում կատարելու մասին» նախագիծը, որը, հիշեցնենք, արդեն առաջին ընթերցմամբ ընդունվել է ԱԺ լիագումար նիստում։
«Կձևավորենք աշխատանքային խումբ։ Նախնական կազմում մեր հանձնաժողովի անդամները կլինեն, եթե ցանկություն հայտնեն այլ հանձնաժողովներից մասնակցելու, ևս կարող են ընդգրկվել։ Խմբում կլինեն ներկայացուցիչներ նաև գործադիրից՝ ֆինանսների և էկոնոմիկայի նախարարություններից»,- ասաց ՀՀ ԱԺ տնտեսական հարցերով մշտական հանձնաժողովի նախագահ Բաբկեն Թունյանը՝ նշելով, որ այդ խմբում կընդգրկեն նաև ցեմենտ արտադրող ընկերությունների ներկայացուցիչներին, տրանսպորտի և շինարարության ոլորտում գործունեություն իրականացնողներին։
ԲՀԿ պատգամավոր Միքայել Մելքումյանն այս նախագծի վերաբերյալ նկատեց, որ ԲՀԿ-ն կողմնակից է, որպեսզի բովանդակային քննարկում անցկացվի, բայց իրենց խմբակցությունն այդ աշխատանքներին չի մասնակցի։
Պատգամավորը նաև հավելեց, որ Գագիկ Ծառուկյանն այս հարցում շահագրգիռ անձ չէ և պետտուրքի մասին օրենքի քննարկման ժամանակ նրա պարզաբանումները բխել են կոլեկտիվի առաջ ունեցած պատասխանատվությունից։
«Ինչ էլ որոշվի՝ դրա պատասխանատվությունը լինելու է քաղաքական մեծամասնության վրա։ Մենք չենք մասնակցելու քննարկումներին, ինչ էլ կորոշեք՝ մեզ համար ընդունելի կլինի այդ որոշումը»,- ասաց ԲՀԿ-ական Միքայել Մելքումյանը։
Խմբակցության պատգամավորներից Նաիրա Զոհրաբյանն էլ հավելեց, որ քաղաքական մեծամասնությունը կրում է քաղաքական պատասխանտվություն բոլոր հնարավոր հետևանքների համար, իսկ իրենք ըմբռնումով կմոտենան այդ քաղաքական պատասխանատվությանը»։
ԱԺ «Բարգավաճ Հայաստան» խմբակցության պատգամավորները լքեցին դահլիճը։
Մանրամասները՝ տեսանյութում։
