Ես Վլադիմիր Գասպարյանի սանիկը չեմ. Դավիթ Սանասարյանը բացառիկ հայրենասեր է․ ՊՎԾ պետի տեղակալ․ ՏԵՍԱՆՅՈՒԹ

Ես որևէ մեկի հետ իմ ազգակցական, քավոր-սանիկական, ընկերական կապերից չեմ ամաչում, երբևէ թաքցնելու որևէ առիթ չեմ ունեցել: Այսօր Կառավարության նիստից հետո տեղի ունեցած ճեպազրույցում ասաց Պետական վերահսկողական ծառայության պետի տեղակալ Արգիշտի Քյարամյանը՝ պատասխանելով նախկին ոստիկանապետ Վլադիմիր Գասպարյանի սանիկը լինելու մասին Factor.am-ի հարցին:

«Ես փոխադարձ հարգանքի հարաբերություններ ունեմ պարոն Գասպարյանի հետ, սակայն որևէ քավոր-սանիկական հարաբերություններ մենք չունենք: Եթե ունենայի այդպիսի հարաբերություններ, մեծ սիրով կբարձրաձայնեի: Ես աշխատել եմ ոստիկանությունում, աշխատել եմ Քննչական կոմիտեում, դատախազության տարբեր մարմիններում, և շփումը նաև այդ համատեքստում է եղել»,- պնդեց Քյարամյանը:

Հարցին՝ մտադի՞ր է զբաղեցնել ՊՎԾ ղեկավարի պաշտոնը, Արգիշտի Քյարամյանն արձագանքեց, որ Դավիթ Սանասարյանը շարունակում է մնալ ՊՎԾ ղեկավարը.  «Այս պահին, քանի որ նա այդ ծառայության ղեկավարն է, իսկ մենք՝ աշխատակիցներս, մեծ հույս ունենք, որ պարոն Սանասարյանը կվերադառնա և կղեկավարի այս կառույցը, հետևաբար՝ ես այս համատեքստում բան չունեմ ավելացնելու»:

Իսկ Դավիթ Սանասարյանին առաջադրված մեղադրանքի մասին ՊՎԾ պետի տեղակալը չցանկացավ խոսել. ասաց՝ որպես իրավաբան՝ չի կարող գնահատական տալ ընթացքի մեջ գտնվող քրեական գործին:

«Սակայն կուզենայի այս հարցին հետևյալ պատասխանը ևս տալ. կարճ ժամանակ է, որ ճանաչում եմ Դավիթ Սանասարյանին և կարծում եմ, որ պարոն Սանասարյանը բացառիկ հայրենասիրական դրսևորումներ ցուցաբերած և արդարության, անաչառության տեսանկյունից բացառիկ որակներ ունեցող անձնավորություն է»,- ասաց Արգիշտի Քյարամյանը:

Մանրամասները՝ տեսանյութում:

Նարեկ Կիրակոսյան