12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Գյումրիում հարգեցին Հայոց ցեղասպանության զոհերի հիշատակը. ԼՈՒՍԱՆԿԱՐՆԵՐ
Հասարակություն
24.04.2019 | 14:08
Գյումրիում Հայոց ցեղասպանության զոհերի հիշտակին նվիրված միջոցառումները առավոտյան մեկնարկեցին պատարագով։ Գյումրու Սուրբ Յոթվերք եկեղեցում մատուցվեց պատարագ, որին մասնակցում էին մարզային և քաղաքային իշխանությունների ներկայացուցիչները՝ մարզպետ Տիգրան Պետրոսյանի և քաղաքապետ Սամվել Բալասանյանի գլխավորությամբ, ինչպես նաև բազմաթիվ հավատացյալներ ու գյումրեցիներ։
Պատարագից հետո նրանց միացան նաև Գյումրիում գտնվող ռուսական դիվանագիտական կորպուսի ներկայացուցիչները, զինվորներ ու անցորդներ ու քայլեցին դեպի Բագրատունյաց պուրակում գտնվող «Վերածնունդ» հուշակոթողը, որը տեղադրվել է Հայոց ցեղասպանության 100-ամյա տարելիցի կապակցությամբ։
Մեզ հետ զրույցում Գյումրիում ՌԴ գլխավոր հյուպատոս Ալեքսանդր Կոպնինը կարծիք հայտնեց, որ Թուրքիան մի օր կճանաչի Հայոց ցեղասպանությունը, ու դա ընդամենը ժամանակի հարց է:
«Ես համոզված եմ, որ մի օր պատմությունը ամեն ինչ կդնի իր տեղը։ Պատմության այս ողբերգությունը արդարացիորեն կճանաչվի։ Ինձ թվում է դա միայն ժամանակի հարց է»,- ասաց Կոպնինը՝ հավելելով․ «Յուրաքանչյուր ժողովուրդ ու պետություն ունի հիշողություն։ Նախնիների մասին այդ հիշողության պահպանումը շատ կարևոր է։ Քանի դեռ ազգը հիշողություն ունի, ապա այն միշտ կլինի միասնական, ամուր»։
Միջոցառման մասնակիցները ծաղիկներ խոնարհեցին հուշակոթողին՝ ի հիշատակ Հայոց ցեղասպանության անմեղ զոհերի։
Էմմա Չոբանյան
