Ջահերով երթ՝ Վանաձորում. Թուրքիայի դրոշն այրվեց եկեղեցու բակում

Այսօր՝ ապրիլի 23-ին, ժամը 19:15 րոպեին, երբ հնչեցին Վանաձորի Սբ. Գրիգոր Նարեկացի եկեղեցու զանգերը, վանաձորցիները եկեղեցու բակից ջահերով շարժվեցին դեպի Սբ. Մարիամ Աստվածածնի եկեղեցի:

Ջահերով երթը ուղեկցվում էր հայրենասիրական երգերով ու տարբեր պահանջատիրական կոչերով. «Յուրաքանչյուր հայի մեջ՝ անկախ իր գտնվելու և բնակության վայրից, նստած է այդ գենետիկական պահանջատիրությունը: Մենք նաև առաջընթացի և զարգանալու խնդիր ունենք, և պետք չէ, որ միայն բողոքականության կամ մեծ կոտորված զգալու մտքով առաջնորդվենք: Ամեն դեպքում հայի համար 100-ից ավելի տարի առաջ տեղի ունենածը մեր հիշողության մեջ է և ոչնչով դեռևս չենք կարող այն փոխարինել, մինչև, որ մեր արդար դատին կամ գոնե հոգեկան բավարարվածության աստիճանին չհասնենք»,- ասում է Վանաձորի քաղաքապետ Մամիկոն Ասլանյանը:

Առաջին անգամ ջահերով երթն անց է կացվել 1999 թվականին՝ ՀՅԴ երիտասարդական և «Նիկոլ Աղբալյան» ուսանողական միությունների նախաձեռնությամբ.

«Առաջին տարին քիչ մարդ էր մասնակցում, բայց այսօր դարձել է համահայկական, համաերիտասարդական մի երթ: Ես կասեի, որ ջահերով երթը պահանջատիրական երթ  է և այլևս մեր երիտասարդությունը ոտքի է կանգնել, և խոսում է այն մասին, որ բավ է միայն ճանաչում ասել, արդեն ժամանակ է արդար հատուցման պահանջի: Այս երթով մեր երիտասարդները ցույց են տալիս, որ պատրաստ են թեկուզ իրենց կյանքը զոհել, բայց մեր արդար պահանջն իրականացել… Եվ երբևիցե ոչ մեկի մտքով չանցնի, որ մեր երիտասարդությունը, որ պատրաստ է զոհվելու հանուն իր հայրենիքի, զոհվում է հանուն ոչնչի: Ոչ ոք իրավունք չունի նման կերպ մտածելու»,- լրագրողների հետ զրույցում ասաց ԱԺ ՀՅԴ նախկին պատգամավոր Արմենուհի Կյուրեղյանը:

Երթի մասնակիցները հասնելով Սբ. Մարիամ Աստվածածնի եկեղեցի՝ այրեցին Թուրքիայի դրոշը, ապա եկեղեցու բակում գտնվող Նահատակած պուրակում բարձրացրեցին միասնական աղոթք:

Տաթևիկ Ղազարյան