Մեկ մլն դրամ համայնքի բյուջեից ․ ինչպե՞ս է Գյումրին նշելու Քաղաքացու օրը

Ապրիլի 27-ին Հայաստանում առաջին անգամ կնշվի Քաղաքացու օրը։ Տոնը պատշաճ կերպով անցկացնելու և տարբեր միջոցառումներ կազմակերպելու համար կառավարությունը պետական բյուջեից հատկացրել է 124 միլիոն դրամ։ Այսչափ գումարի հատկացումը հասարակական ու քաղաքական տարբեր հարթակներում քննարկումների և դժգոհության առիթ դարձավ։

ԱԺ «Իմ քայլը» խմբակցության ղեկավար Լիլիթ Մակունցը լրագրողների հետ զրույցում շտապեց հանգստացնել բոլորին և նշել, որ հատկացված գումարը ծախսվելու է ոչ միայն մայրաքաղաքում, այլև բոլոր մարզերում։

Իսկ ինչպե՞ս կնշվի Քաղաքացու օրը Հայաստանի ամենաաղքատ մարզում՝ Շիրակում և մարզկենտրոն Գյումրիում։

Ապրիլի 12-ին կայացած նիստում Գյումրիի ավագանին միաձայն որոշել էր քաղաքի բյուջեից հատկացնել 1մլն դրամ Քաղաքացու օրը նշելու համար, որից 500․000 դրամը նախատեսված է հրավառության, 250․000 դրամը հյուրասիրության, մնացած 250․000 դրամն էլ արհեստների, արվեստների փառատոնի, էքսպոզիցիաների տեղափոխման տրանսպորտային ծախսերը հոգալու համար։

Գյումրիի քաղաքապետի մամուլի խոսնակ Սոնա Առաքելյանը մեզ տեղեկացրեց, որ եթե նախատեսված գումարը չծախսվի՝ այն կվերադարձվի համանքի բյուջե։ Նա հավելեց, որ ընդհանուր առմամբ, Գյումրիում Քաղաքացու օրվան նվիրված միջոցառումները կազմակերպվում ու անցկացվում են Շիրակի մարզպետարանի կողմից։

Ֆինանսական մասի պատասխանատուն ևս Շիրակի մարզպետարանն է։ Ստեղծվել է նույնիսկ ֆեյսբուքյան հատուկ էջ՝ «ՀՀ քաղաքացու օր․ Շիրակի մարզ» անունով։ Այստեղից էլ տեղեկանում ենք, որ Քաղաքացու օրը կնշվի տարբեր կրթամշակութային միջոցառումներով՝ տեղի կունենան մի շարք հանրային քննարկումներ, ծառատունկ, «Տես ու համտես»՝ արհեստների ու արվեստների փառատոն, Գյումրիում կներկայացվի «Անուշ» օպերան, տոնական օրը կեզրափակվի համերգով։

Էմմա Չոբանյան