09.08.2026 | 16:37
Վթարային ջրանջատում Կտայքում և Երևանում
«Ժառանգությունը» հավաստում է իր հավատարմությունը նորհայաստանյան պետության գաղափարաբանությանը. հայտարարություն
Քաղաքականություն
23.04.2019 | 12:01
«Ժառանգություն» կուսակցության վարչությունը հայտարարություն է տարածել, որում ասվում է.
«2018թ. ապրիլ 23-ը մեր նորօրյա ժամանակագրության կարևորագույն հանգրվաններից է: Հարյուր հազարավոր արժանապատիվ հայեր միակամ «ոչ» ասացին հանցավոր իշխանության վերարտադրության բոլոր փորձերին, ինչը դարձավ խաղաղ ընդվզման միջոցով Նոր Հայաստանի կերտման դժվարին շրջափուլ, որի հիմքում ժողովրդի հավաքական կամքի առջև իշխող խմբավորումների անզորությունն էր:
Ժողովրդի կողմից մերժված իշխանության հիմնական թևերի խաղաղ ճանապարհով հեռացումը «Ժառանգություն» կուսակցությունը համարում է մեր պետականության պատմության վճռորոշ հանգրվան: Հայաստանում իրավիճակ փոխվեց, որի շնորհիվ հայ ժողովուրդը Հայաստանում, Արցախում և ի Սփյուռս աշխարհի հնարավություն է ստացել կերտելու իսկապես Նոր Հայաստան, որը դեռ ապագայի տեսլական է, այդ նպատակի հիմնական դրույթների իրականացմանը պետք է միտված լինի ներկայիս իշխանության բոլոր թևերի և քաղաքացիական հանրության գործունեությունը:
Մեր նպատակներն են՝
Ա. Հայաստանի քաղաքացիների շահերի իրավական պաշտպանությունը, հասարակական ու քաղաքական ժողովրդավարական ինստիտուտների կայացումը:
Բ. Հայաստանի և Արցախի պետական անվտանգության հետագա ապահովումը:
Գ Քաղաքացիների առջև նոր իշխանության ստանձնած սոցիալական, տնտեսական և քաղաքական պարտավորությունների անխոս կյանքի կոչումը, կորսված արդարության հաստատումը:
«Ժառանգությունը» փաստում է, որ հեղափոխական շրջադարձից հետո անցած մեկ տարին բավարար էր երկրում առկա խնդիրները համակարգելու և լուծման ռազմավարությունը մշակելու համար: Սակայն իշխող քաղաքական ուժի վերջին գորոծողությունները թյուրըմբռնումների տեղիք են տալիս: Համաժողովրդական շարժման իրական արժեքների ձևի ու բովանդակության շեղումները տագնապալի ենք համարում: Համոզված ենք, որ դեռ չեն կատարվել անուղղելի և համակարգային սխալներ, ուստի ժամանակն է հասարակական և քաղաքական համերաշխության մթնոլորտում լսելու միմյանց ձայնը և համագործակցային միջավայրում շտկելու բացթողումները, ըմբռնելու համակարգային վերլուծություններն ու առաջարկները:
Երկրի կառավարման ղեկը ստանձնած քաղաքական ուժը կարող է շարժման արժեքները կյանքի կոչել՝ ձերբազատվելով անսխալականությունից և հասարակական, քաղաքական ուժերի հանդեպ իր ունեցած անվստահության կանխակալ վերաբերմունքը հաղթահարելով միայն: Այլապես ստիպված ենք լինելու արձանագրել, որ Հայաստանում հակահեղափոխականը այսուհետ համաժողովրդական շարժման արդյուքնում իշխանություն դարձած քաղաքական ուժն է լինելու՝ համաժողովրդական շարժման արժեքների կյանքի կոչման ու տապալման համակարգում:
«Ժառանգությունը» մի անգամ ևս հավաստում է իր հավատարմությունը նորհայաստանյան պետության գաղափարաբանությանը, հանուն որի կայացման շարունակելու ենք մեր գործունեությունը՝ ազատ, անվտանգ միջավայր, ստեղծարար քաղաքացի, հզոր պետականություն կայացնելու դժվարին աշխատանքը»:
