Գրքատոն՝ նվիրված Կոմիտասին ու Թումանյանին․ ավարտվեց ազգային գրադարանային շաբաթը

Խնկո Ապոր անվան ազգային մանկական գրադարանում այսօր ամփոփվեց Ազգային գրադարանային շաբաթը։ Հայաստանի գրադարաններում 7-օրյա գրքատոնն արդեն 18-րդ անգամ էր անցկացվում։ Նախաձեռնությունը «Հայկական գրադարանային ասոցիացիայինն» էր՝ Մշակույթի նախարարության աջակցությամբ։

Գրադարանային 18-րդ շաբաթը տարբերվող էր՝ նվիրված մեծանուն բանաստեղծ Հովհաննես Թումանյանի և երգահան-կոմպոզիտոր Կոմիտասի 150-ամյակներին։

«Այս տարի կազմակերպել ենք ցուցահանդեսներ, վիկտորինաներ, հեքիաթապատումներ, տիկնիկային ներկայացումներ ու երաժշտական ունկնդրումներ՝ նվիրված Թումանյանին ու Կոմիտասին: Հատկապես կարևոր էին հայ երիտասարդ գրողների մասնակցությամբ հանդիպում-քննարկումները, որոնց ընթացքում մասնակիցները գրքերն անձամբ հեղինակների հետ էին քննարկում»,- Factor.am-ի հետ զրույցում նշեց Խնկո Ապոր անվան ազգային մանկական գրադարանի աշխատակցուհի Գայանե Կարապետյանը։

Նրա խոսքով՝ Ազգային գրադարանային շաբաթը հագեցած էր նաև մասնագիտական փոխայցելություններով։ Շաբաթվա ընթացքում հասցրել են լինել Հայաստանի ազգային գրադարանում, որտեղ փոքրիկ հոգեբանական դասընթաց են ունեցել, ինչպես նաև մայրաքաղաքի Աջափնյակի գրադարանների կենտրոնացված համակարգի, Ավ. Իսահակյանի անվան, Նոր Նորքի կենտրոնական և Շենգավիթի թիվ 32 գրադարաններում։

Ազգային գրադարանային շաբաթվա շրջանակում մարզային գրադարաններում նույնպես միջոցառումներ են անցկացվել։ «Այս տարի այցելել ենք նաև Յոլյանի արյունաբանական կենտրոն և տեսակցել բուժվող փոքրիկներին, գրքեր նվիրաբերել։ Բացի այդ, գրադարան են այցելել հարյուրավոր աշակերտներ Երևանի 19 դպրոցներից»,- ընդգծեց Գայանե Կարապետյանը։

Ազգային գրադարանային շաբաթվա շրջանակում իրականացվող միջոցառումներն ապրիլի 15-ին էին մեկնարկել։ Գայանե Կարապետյանի խոսքով՝ դեռ շարունակական կլինեն, քանի որ նպատակ ունեն հասարակության զարգացման գործում մեծացնել գրքի և գրադարանների դերը, ինչպես նաև ընթերցող-գրադարան կապն ավելի անմիջական դարձնել։

Նելլի Մելքոնյան