ԲՀԿ-ական պատգամավորն առաջարկում է փակել Երևանում գործող թրաֆիքինգի օջախ հանդիսացող մերսման սրահները․ ՏԵՍԱՆՅՈՒԹ

Ազգային ժողովում քննարկվում է «Մարդկանց թրաֆիքինգի և շահագործման ենթարկված անձանց նույնացման և աջակցության մասին» ՀՀ օրենքում փոփոխություններ ու լրացումներ կատարելու մասին Կառավարության ներկայացրած օրենքի նախագիծը։

ԱԺ «Բարգավաճ Հայաստան» խմբակցության պատգամավոր Սերգեյ Բագրատյանը նախագծի հիմնական զեկուցող աշխատանքի և սոցիալական հարցերի նախարարի տեղակալ Գեմաֆին Գասպարյանի ուշադրությունը հրավիրեց «հանրապետությունում և հատկապես՝ Երևանում գործող մերսման սրահներում թրաֆիքինգի դրսևորումներին՝ սեռական շահագործմանն ու անկանոն աշխատանքային գրաֆիկին»։

«Առաջարկում եմ, որ Ձեր կառույցն ուսումնասիրի այս երևույթը և հնարավորինս արագ փակեք Երևանում գործող թրաֆիքինգի այդ կենտրոնները»,- ասաց  պատգամավորը։

Հարցին ի պատասխան՝ նախարարի տեղակալը նշեց, որ թրաֆիքինգի զոհերի հետ կապված աջակցության գործընթացն իրականացնում է իրենց նախարարությունը, իսկ պաշտպանության գործընթացը՝ Ոստիկանությունը։

«Մենք միշտ պատրաստ ենք աջակցել, իսկ քրեական գործեր հարուցելն ու վարույթ ընդունելն արդեն Ոստիկանության տիրույթում է»,- ասաց Գասպարյանը։

Փոխնախարարին ի պատասխան Սերգեյ Բագրատյանը հավելեց․ «Հարգելի՛ պաշտոնյա, ես Ձեզ չեմ հարցնում, որ ինձ ուղղորդեք՝ ինչը որտեղ է, ես Ձեզ ասում եմ՝ ուսումնասիրեք այդ երևույթները և դրանց մասին համապատասխան եզրակացությունները ներառեք առաջինից երկրորդ ընթերցման ժամանակ․ թե չէ ով պետք է զբաղվի դրանով՝ ձեզանից լավ գիտենք»։

Մանրամասները՝ տեսանյութում։

Աղավնի Սուքիասյան