14.12.2025 | 11:41
Ապարանի համայնքապետարանը՝ քամու պատճառած վնասների մասին
Չեմ կարող լինել այնպիսի ղեկավար, որի կամքը հեշտ է ծռել. Փաշինյան
Քաղաքականություն
19.04.2019 | 20:43
Վարչապետ Նիկոլ Փաշինյանն, ով այսօր ֆեյսբուքյան ուղիղ եթերում պատասխանում է ամենաշատ լայքեր հավաքած հարցերին, կարդաց օգտատերերից մեկի խնդրանքը Նորագավիթի մաքսատան միջադեպի հետևանքով աշխատանքից ազատված ՊԵԿ աշխատակցին ներելու մասին:
«Պետք է խոստովանեմ, որ ես համարում եմ, որ ճիշտ եմ ռեակցիա տվել։ Գուցե այդ աշխատանքից ազատված քաղաքացու համար դոզան շատ էր»,– ասաց նա:
Վարչապետը նշեց, որ մաքսատան այդ դեպքից հետո երկար է մտածել ու հասկացել է, որ հասկացել՝ իր մոտեցումը խնդրին ճիշտ էր:
«Ցանկացած տեղ էլ, որ մտնեմ ու նորից էդպիսի իրավիճակ տեսնեմ, բոլորին ազատելու եմ աշխատանքից: Ցավում եմ, որ չեմ կարող Ձեր ցանկությունը կատարել: Սակայն ես կարծում եմ, որ ամենավտանգավոր բանը դա թույլ ղեկավարն է: Ես չեմ կարող լինել այնպիսի ղեկավար, որի կամքը հեշտ է ծռել»,-ասաց Փաշինյանը:
Վարչապետը նշեց, որ ներողություն խնդրելու որևէ խնդիր չունի. եթե գիտակցի, որ ինքը սխալ է, պատրաստ է ներողություն խնդրել, բայց դա չի անի մաքսատանը կատարվածի հետ կապված:
«Ուսադիրներով, զինվորական կարգապահության ռեժիմում աշխատող պաշտոնյայի նկատմամբ պահանջները պետք է լինեն չափազանց մեծ»,-ասաց նա:
Անդրադառնալով այն մեկնաբանություններին, որ այդ պարագայում պետք է հրաժարական պահանջեր ոչ թե ՊԵԿ աշխատակցից, այլ ՊԵԿ նախագահից՝ վարչապետն ասաց.
«Այդ տրամաբանությամբ իմ հրաժարականը պետք է պահանջեմ»:
Հիշեցնենք, որ ՀՀ վարչապետ Նիկոլ Փաշինյանն ապրիլի 14-ին Նորագավիթի ավտոմաքսատանը շրջայցի ընթացքում տեսել էր, որ անկյունում դրված է Հայաստանի կեղտոտված դրոշը, որից հետո հրահանգել էր ազատել այդ սենյակում աշխատող բոլոր ՊԵԿ աշխատակիցներին:
