13.01.2025 | 09:44
Շիրակի մարզում և Թալինի տարածաշրջանում մառախուղ է
Անվտանգության խորհուրդը մինչև հիմա մեզ մոտ ձևական մարմին է եղել. Արա Պապյան. ՏԵՍԱՆՅՈՒԹ
Քաղաքականություն
19.04.2019 | 13:50
Անվտանգության խորհուրդը չպետք է ձևական մարմին լինի, ըստ էության՝ մենք առ այսօր այդպիսին ենք ունեցել: «Հայաստանը վերանայում է ազգային անվտանգության ռազմավարությունը. ի՞նչը և ինչպե՞ս փոխել հիմնարար փաստաթղթում» թեմայով քննարկման ժամանակ նման կարծիք հայտնեց «Մոդուս Վիվենդի» վերլուծական կենտրոնի ղեկավար, քաղաքագետ Արա Պապյանը:
«Մենք հիշում ենք՝ այդ մարմինն ինչպես ստեղծվեց, հիշում ենք՝ ովքեր են այդտեղ եղել: Այնինչ, օրինակ, մեր հարևան Թուրքիայի պարագայում Անվտանգության խորհուրդը կարևորագույն մարմինն է՝ անգամ Կառավարությունից ավելի կարևոր»,- հավելեց նա:
Ինչ վերաբերում է անվտանգության նոր ռազմավարությանը, ըստ Արա Պապյանի՝ այն մշակելիս մասնագիտական մոտեցում է պետք՝ նկատի առնելով մարտահրավերներն ու առկա իրողությունները:
«Նախ՝ մենք պետք է տեսնենք, թե ինչպիսի նոր մարտահրավերներ կան կամ որքանով են խորացել հները, դրանց համարժեք դիմակայելու, չեզոքացնելու հնարավորությունները պիտի նայենք: Եվ մի փոքր էլ պիտի կանխատեսումներ անենք՝ ունենալով տաբերակներ, թե որ դեպքում ինչ պիտի լինի»,- ասաց նա:
Քաղաքագետի կարծիքով՝ այս ամենը մեկ փաստաթղթով հնարավոր չէ անել. «Առավել ևս՝ սա բաց փաստաթուղթ է: Ես կարծում եմ ճիշտ կլինի, որ այդ ռազմավարությունն ունենա բաց մաս, որի մեջ հիմնական սկզբունքները պիտի շարադրված լինեն, բայց նաև պիտի ունենա փակ մաս, փակ փաստաթղթեր՝ ավելի կոնկրետ գործողությունների շարադրանքով՝ ըստ սցենարների, որպեսզի դառնա գործող փաստաթուղթ, որ չլինի ձևական»:
Մանրամասները՝ տեսանյութում:
