16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Կա՛մ Դավիթը գնում է բանտ, կա՛մ ԱԱԾ տնօրենը՝ տուն. Նորայր Նորիկյան
Հասարակություն
19.04.2019 | 00:08
Փաստաբան Նորայր Նորիկյանը Ֆեյսբուքում գրառում է կատարել՝ Դավիթ Սանասարյանի շուրջ ծավալվող գործընթացները որակելով աղմկոտ սկանդալ:
«Անկեղծ ասած, հավատս չի գալիս, որ Դավիթը կարող էր ներքաշված լինել այսպիսի կոռուպցիոն գործընթացի մեջ: Այդուհանդերձ, Հայաստանում պետք է հարգել ցանկացած անձի անմեղության կանխավարկածը և այն դարձնել կյանքի նորմ:
Եթե մեղադրանքը հիմնավոր լինի, բնականաբար, ով ուզում է լինի, պետք է ենթարկվի պատասխանատվության, իսկ եթե ոչ, ապա բազմիցս նշել եմ, որ որևէ անմեղ անձ մեր երկրում չպետք է պատժվի: Բայց այդ մասին չէ, որ ուզում եմ խոսել:
Պատկերավոր ասված, Ազգային անվտանգության ծառայությունը վարչապետի աջ ձեռքն է, իսկ պետական վերահսկողական ծառայությունը՝ ձախ ձեռքը, կամ ճիշտ հակառակը:
Եվ երբ ԱԱԾ-ում քննվող քրեական գործի շրջանակներում մեղադրանք է առաջադրվում պետական վերահսկողական ծառայության պետին, պետք է արձանագրել, որ անկախ այս քրեական գործի ելքից, գործընթացն ինքնին լրջագույն հարված է վարչապետ Նիկոլ Փաշինյանի քաղաքական իշխանության հեղինակությանը:
Այս գործընթացից որևէ իշխանություն չի կարող շահած դուրս գալ: Սա կոռուպցիայի դեմ պայքար չէ, ո՛չ էլ կոնկրետ անձին լիկվիդացնելու փորձ: Խոսքը գնում է պետական համակարգում կարևորագույն երկու ինստիտուտների միջև գոյություն ունեցող անվստահության ցցուն դրսևորման մասին, ինչը նշանակում է, որ գործ ունենք դեռևս ամբողջությամբ չամրացած, ներքին խնդիրներով ծանրաբեռնված և միմյանց նկատմամբ փոխադարձ վստահություն չունեցող համակարգի հետ…
Այս գործի վերջաբանը շատ պարզ է. կա՛մ Դավիթը գնում է բանտ, կա՛մ ԱԱԾ տնօրենը՝ տուն…»,- գրել է Նորայր Նորիկյանը:
