06.08.2026 | 09:00
Կառավարության նիստը. ՈՒՂԻՂ
«Իմ քայլում» թեժ քննարկվել է Պուտինի՝ «Հոկտեմբերի 27»-ի պատվիրատու լինելու մասին պատգամավորներից մեկին վերագրվող հայտարարությունը
Քաղաքականություն
18.04.2019 | 20:40
Կիրակի՝ ապրիլի 14-ին, «Իմ քայլը» խմբակցությունը «Քաղաքացիական պայմանագիր» կուսակցության գլխամասային գրասենյակում խմբակցության նիստ է հրավիրել: Նիստի առանցքում եղել են որոշ պատգամավորների հայտարարությունները:
Factor.am-ին հայտնի դարձավ, որ խմբակցությունում քննարկել են պատգամավորների այնպիսի հայտարարություններ, որոնք բացասական են անդրադառնում հայ-ռուսական հարաբերությունների վրա: Մասնավորապես, մեզ հայտնի դարձավ, որ խմբակցությունում թեժ քննարկվել է ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանին վերագրվող այն հայտարարությունը, թե «Հոկտեմեբրի 27»-ի պատվիրատուն Վլադիմիր Պուտինն է:
Հիշեցնենք, որ Քոչարյանն արդեն հերքել է, որ նման բան է ասել՝ այդ մասին մամուլի հրապարակումները որակելով որպես կեղծ տեղեկատվություն։ Այնուհանդերձ՝ խմբակցության նիստում ասվել է, որ այդ հայտարարության հետ կապված որոշ ռուս գեներալներ են զանգահարել հայ պաշտոնյաներից մի քանիսին և կոշտ խոսակցություն ունեցել։ ԱԺ «Իմ քայլը» խմբակցության ղեկավար Լիլիթ Մակունցը մեզ հետ զրույցում նշեց, որ այդ կապակցությամբ ինքը որևէ զանգ չի ստացել։ Միաժամանակ, խմբակցության ղեկավարը չհերքեց, որ մեր նշած թեման կիրակի օրը քննարկել են խմբակցությունում:
«Մենք շոշափել ենք տարբեր նուրբ հարցեր: Ես չեմ ասում Ձեր ասածի որն է սխալ, որը՝ ճիշտ: Քննարկվել են շատ նուրբ հարցեր, որոնց հետ կապված մեկնաբանություն չեմ ուզում անել: Այդ թվում՝ հարցերը վերաբերվել են արտաքին քաղաքականությանը»:
Անդրանիկ Քոչարյանն էլ մեզ հետ զրույցում ասաց, որ գործուղման է եղել և կիրակի օրվա խմբակցության նիստին չի մասնակցել: Նա վերստին ընդգծեց, որ ինքը չի հայտարարել, թե «Հոկտեմեբրի 27-ի» պատվիրատուն Վլադիմիր Պուտինն է։
Նարեկ Կիրակոսյան
