Ի՞նչ էին փնտրում ՀՔԾ-ն ու ԱԱԾ-ն Միհրան Պողոսյանի առանձնատանը. ՏԵՍԱՆՅՈՒԹ

Այսօր Դատական ակտերի հարկադիր կատարման (ԴԱՀԿ) ծառայության նախկին պետ, Ազգային ժողովի նախկին պատգամավոր Միհրան Պողոսյանի գրասենյակը հայտարարություն տարածեց, որ նրա առանձնատանն ու նախկին գրասենյակում ԱԱԾ-ն խուզարկություն է իրականացնում։

Ավելի ուշ ԱԱԾ-ից Factor.am-ին փոխանցեցին, որ խուզարկություն իրականացվել է Հատուկ քննչական ծառայության կողմից, Ազգային անվտանգության ծառայողներն ապահովել են խուզարկությունների բնականոն ընթացքը:

Հատուկ քննչական ծառայությունից հաստատեցին, որ առգրավում և խուզարկություն է իրականացվել, բայց մանրամասներ չհաղորդեցին։ Առանձնատան տարածքում Factor.am-ը ֆիքսեց, թե ինչպես են Միհրան Պողոսյանի տանից կապոցներ տանում։

Հիշեցնենք, որ ՀՔԾ-ն այս տարվա հունվարի 24-ին վերսկսեց օֆշորի քրեական գործի վարույթը։ Իսկ ապրիլի 15-ին հաղորդեց, որ Պողոսյանն օֆշորի գործով ներգրավվել է որպես մեղադրյալ։ Նրան մեղադրանք է առաջադրվել հանրորեն վտանգավոր այն արարքների կատարման համար, որ նա, օգտագործելով պաշտոնեական դիրքը, վատնման եղանակով առանձնապես խոշոր չափերով գույք է հափշտակել և չարաշահել իր պաշտոնեական լիազորությունները, ինչն առաջացրել է ծանր հետևանքներ: Միհրան Պողոսյանի նկատմամբ կայացվել է կալանավորելու որոշում։ Նա հետախուզման մեջ է։

Օրերս էլ ԱԱԾ տնօրեն Արթուր Վանեցյանը լրագրողների հետ զրույցում ասաց, թե Պողոսյանի գտնվելու վայրը ԱԱԾ-ին հայտնի է։ Այս հայտարարությանը հաջորդեց Միհրան Պողոսյանի գրասենյակի հայտարարությունը, որում հստակ նշվում է վերջինիս բնակության հասցեն․ «ք․ Մոսկվա, Մոսֆիլմովսկայա 70 շենք, 1-ին կորպուս, բն 139»։

Այս գործով նախաքննությունը շարունակվում է։

Մանրամասները ՝տեսանյութում։

Լիլիթ Շաբոյան