08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
«Կրթություն և կարիերա». Երևանում մեկնարկել է 19-րդ մասնագիտացված ցուցահանդեսը. ՏԵՍԱՆՅՈՒԹ
Հասարակություն
17.04.2019 | 20:59
Որակյալ կրթությունը հաջողված կարիերայի գրավականն է. այս համոզմունքն են կիսում բոլոր նրանք, ովքեր հավաքվել են մեկ հարկի տակ՝ մասնակցելու «Կրթություն և կարիերա» միջազգային մասնագիտացված ցուցահանդեսին:
«Լոգոս Էքսպո կենտրոն»-ը նման ցուցահանդես արդեն 19-րդ անգամ է անցկացնում, այս տարի՝ ընդլայնված աշխարհագրությամբ ու կազմակերպությունների ավելի մեծ թվով:
«Ցուցահանդեսի նպատակն է հնարավորինս ընդլայնված ներկայացնել ուսումնական հաստատությունները Հայաստանում և հնարավորություն տալ այցելուներին՝ ընտրություն կատարել իրենց ապագա ուսուցման համար»,- նշում է «Լոգոս Էքսպո կենտրոն»-ի տնօրեն Սուրեն Նազինյանը:
«Կրթություն և կարիերա» ցուցահանդեսը Կրթության և գիտության նախարարության աջակցությամբ է կազմակերպվել: Բացման արարողությանը նախարարն էլ էր ներկա:
«Այս էքսպոները կարևոր են, որպեզի մենք ֆիքսենք՝ ինչ ունենք այս պահին , հնարավորություն ստեղծենք ուսումնական հաստատությունների համար՝ միմյանց հետ համագործակցելու, ինչպես նաև արտադրողների համար՝ գալու այստեղ և իրենց բիզնեսի համար կիրառելու այն արտադրանքը, որոնք ունեն ուսումնական հաստատությունները: Բուհերն այդ օղակները չեն ստեղծում, որոնց միջոցով կառևտրայնացնեն ունեցած արտադրանքը և անցկացրած հետազոտությունները»,- ընդգծում է Արայիկ Հարությունյանը։
Ցուցահանդեսին 80 կրթական կազմակերպություն է ներկայացված: Մասնակիցների մի մասն այստեղ է՝ տեղեկանալու կրթական նոր ծրագրերին, մյուս մասը՝ մեծ ոգևորությամբ ներկայացնելու սեփական աշխատանքները: Օրինակ՝ այս անօդաչու թռչող սարքի միջոցով հնարավոր է մինչև 200 կմ շառավղով նկարահանում իրականացնել, իսկ այս տիկնիկն էլ կարող է վեց լեզվով պատմել բնական աղետների մասին։
«Այս տիկնիկի միջոցով երեխան կարող է լսել բնական երևույթների մասին, նրանց վտանգների մասին ու հարցուպատասխանի միջոցով հասկանալ, թե ինչի հետ գործ ունի․ օրինակ՝ երկրաշարժը ինչ է, ինչպես կարելի է դրանից պաշտպանվել»,- պատմում է Ճգնաժամային կառավարման ակադեմիայի մագիստրոս Արայիկ Հակոբջանյանը։
Եռօրյա ցուցահանդեսի շրջանակում կանցկացվեն նաև դասընթացներ, քննարկումներ, իսկ ավարտին՝ աշխատանքային տոնավաճառ, որտեղ ստեղծարար մտքերով երիտասարդները հնարավորություն կունենան ցուցադրել իրենց կարողությունները:
Մանրամասները՝ տեսանյութում:
Նելլի Մելքոնյան
