Հակոբ Արշակյանը՝ միասնական տրանսպորտային համակարգի ներդրման մասին. ՏԵՍԱՆՅՈՒԹ

Հայաստանում կան բազմաթիվ համայքներ, որտեղ տրանսպորտային լուրջ խնդիրներ կան. դրանք կապված չեն ո՛չ մարզկենտրոնների, ո՛չ Երևանի հետ: Այսօր հրավիրված ասուլիսում այս մասին ասաց ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը:

Միասնական տրանսպորտային համակարգի ներդրման արդյունքում փորձելու են լուծել այդ խնդիրը:

«Հիմա ուղևորահոսքի հաշվարկների ճշգրտում է տեղի ունենում, որի արդյունքում մենք կհասկանանք, թե ինչ տիպի տրանսպորտային միջոցներ են անհրաժեշտ, ինչ քանակի, ինչ հաճախությամբ պետք է դրանք երթևեկեն և այս մոդելի մեջ կիրառվեն: Դրանից հետո տեղի կունենան մրցույթներ՝ կենտրոնացված ուղևորացանցի սպասարկման համար, և կգործարկվի նոր ցանցը»,- նշեց Հակոբ Արշակյանը՝ հավելելով, որ մայիսին արդեն կունենանք ուղևորահոսքերի ամբողջական պատկերը, ինչից հետո հնարավոր կլինի անցնել մոդելավորման փուլին:

Նախարարի ներկայացմամբ՝ միասնական տրանսպորտային համակարգը ենթադրում է միասնական տոմսային համակարգի ներդրում, որպեսզի «մարդը մի կետից մյուսը գնալու համար կարողանա հստակ պատկերացնել, թե որտեղ պետք է իջնի, ինչ այլ տրանսպորտ նստի և երբ պետք է հասնի տեղ»:

Իսկ օպերատորների բաշխումը կախված է կոնկրետ ուղղությունների եկամտաբերության աստիճանից, այդ հաշվարկը նույնպես կատարվում է: «Այսինքն՝ ուղևորափոխադրման ինքնարժեքի գնահատում է կատարվում, դա կապվում է սակագնի հետ և հասկանալի է դառնում՝ այս կամ այն ուղղությունը եկամտաբե՞ր է, թե՞ ոչ»,- պարզաբանեց նախարարը:

Ամեն դեպքում, մրցույթ հայտարարելու և ներդրումային ծրագրեր իրականացնելու մասին խոսելը Հակոբ Արշակյանը վաղ է համարում, քանի որ դեռ հարկավոր է հավաքագրել ամբողջական տվյալներն ու մշակել:

Մանրամասները՝ տեսանյութում: