Նիկոլ Փաշինյանը դժգոհել է որոշ պաշտոնյաների աշխատանքից. ոչ աշխատանքային օրով հանդիպում է եղել կառավարությունում

Շաբաթ օրը Նիկոլ Փաշինյանի գլխավորությամբ կառավարությունում  խորհրդակացություն է տեղի ունեցել: Ներկա են եղել նախարարներ, ՊԵԿ ղեկավարը, ԿԲ նախագահը և Երևանի քաղաքապետը:

Տեղեկացանք, որ Նիկոլ Փաշինյանը բոլորից հատ առա հատ պարզաբանումներ է պահանջել, թե իր տրված հանձնարարականներից որն է մինչ այս կատարվել: Վարչապետի հարցադրումները հիմնականում ուղղված են եղել տնտեսական բլոկի գերատեսչությունների ղեկավարներին:

Կառավարության Factor.am-ի աղբյուրները փոխանցեցին, որ Նիկոլ Փաշինյանը մի քանի պաշտոնյայից խիստ դժգոհ է եղել: Այն, որ Նիկոլ Փաշինյանին չի գոհացրել Կառավարության որոշ անդամների աշխատանը, Factor.am-ի հետ զրույցում չհերքեց նաև վարչապետի մամուլի խոսնակը:

Վլադիմիր Կարապետյանից հետաքրքրվեցինք՝ արդյոք Նիկոլ Փաշինյանին բավարարե՞լ է գերատեսչությունների ղեկավարիների զեկուցումները, թե՝ ոչ: «Վարչապետն ուշադիր լսել է, տվել է գնահատականներ, ամեն դեպքում առանձին գնահատականներ են եղել և պայմանավորվածություն է ձեռք բերվել շարունակել նման կարգի խորհրդակցությունները»:

Ճշտող հարցին՝ Փաշինյանի գնահատականները դրակա՞ն են եղել, թե՝ բացասական, Վլադիմիր Կարապետյանը պատասխանեց՝ «հիմնականում դրական»:

Մեր աղբյուրի փոխանցմամբ՝ Նիկոլ Փաշինյանը նոր հանձնարարականներ է տվել և հորդորել, որ դրանց կատարմանը խիստ հետևողական լինեն:

Factor.am-ը վարչապետի մամուլի խոսնակից հետաքրքրվեց, թե որն է եղել փակ հանդիպման նպատակը. «Դա փակ չէր, պարզապես խորհրդակացություն էր: Ինչո՞ւ եք անունը փակ դրել»:

Դիտարկմանը, որ այն մամուլի կողմից  չի լուսաբանվել,  վարչապետի խոսնակն արձագանքեց՝ Նիկոլ Փաշինյանը մեկ օրում մի քանի տասնյակ խորհրդակացություններ է ունենում, որոնցից ոչ բոլորն են լուսաբանվում:  Վարչապետի խոսնակը նաեւ ընդգծեց, որ  այդ խորհրդակցության մասին Վարչապետի աշխատակազմը պաշտոնական հաղորդագրություն է տարածել։

Նարեկ Կիրակոսյան