08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Վճռաբեկը դատարանը գողության համար դատապարտված 4 երեխաների մորը 2 տարի փորձաշրջան նշանակեց
Հասարակություն
11.04.2019 | 17:15
Վճռաբեկ դատարանն այսօր Սիսիանի բնակիչ Հասմիկ Սարգսյանի նկատմամբ պատիժ սահմանեց 2 տարի փորձաշրջան՝ Քրեական օրենսգրքի 70-րդ հոդվածի համաձայն։
Նշենք, որ 3 անչափահաս և մեկ չափահաս երեխաների մայր Հասմիկ Սարգսյանի նկատմամբ Վերաքննիչ դատարանն ավելի վաղ սահմանել էր պատիժ 5 տարի ժամկետով, սակայն Վճռաբեկ դատարանն այսօր բեկանեց այդ որոշումը։
Հիշեցնենք, որ ՀՀ ՔԿ Սյունիքի մարզային քննչական վարչության վարույթում 2015-2017թթ. հարուցվել էր երեք քրեական գործ՝ Հ.Սարգսյանի կողմից կատարված գողությունների դեպքերի առթիվ, որոնք մեղադրական եզրակացությամբ ուղարկվել են դատարան:
Մասնավորապես՝ մինչդատական վարույթում ձեռք բերված փաստական տվյալների հիման վրա Հ.Սարգսյանին 2015թ. մեղադրանք է առաջադրվել՝ ՀՀ քրեական օրենսգրքի 177-րդ հոդվածի 1-ին մասով և 177-րդ հոդվածի 3-րդ մասի 1.1-ին կետով, 2016թ.՝ ՀՀ քրեական օրենսգրքի 177-րդ հոդվածի 3-րդ մասի 1.1-ի կետով, իսկ 2017թ.՝ 177-րդ հոդվածի 3-րդ մասի 1.1-ի կետով:
Նշված քրեական գործերով նախնական քննության փուլում քննիչը մեղադրյալի նկատմամբ որպես խափանման միջոց է ընտրել ստորագրություն չհեռանալու մասին: Դատաքննության արդյունքների և նշանակված պատժաչափի ու տեսակի վերաբերյալ հարցադրումները մինչդատական վարույթի իրավասությունից դուրս են։
Ինչ վերաբերում է մեղադրյալի այն հայտարարությանը, թե, իբր, 2017 թվականին արձանագրված գողության դեպքի առթիվ հարուցված քրեական գործի նախաքննության ընթացքում քննիչը կիրառել է քննության խորթ մեթոդ և քանոնով սպառնացել է ընդունել մեղքը, ապա կոչ ենք անում նրան՝ օրենքով սահմանված կարգով ներկայացնել հաղորդում, ինչը հնարավորություն կտա իրավասու մարմնին պարզել բոլոր հանգամանքները և բազմակողմանի, օբյեկտիվ ու լրիվ քննության արդյունքում համապատասխան անձանց գործողություններին տալ համարժեք քրեաիրավական գնահատական։
