03.04.2026 | 23:13
NASA-ն հրապարակել է Երկրի նոր լուսանկարը
Ալեքսանդր Սարգսյանը դեռ Եվրոպայում է, բայց մտադիր է վերադառնալ․ որդին նրա հետ կապի մեջ է
11.04.2019 | 17:03
Ալեքսանդր Սարգսյանը՝ ՀՀ երրորդ նախագահ Սերժ Սարգսյանի եղբայրը, դեռևս Եվրոպայում է։ Այս մասին այսօր լրագրողների հետ զրույցում ասաց նրա որդին՝ Հայկ Սարգսյանը։
Նա հայտնեց, որ հոր հետ շփվում է հեռախոսով․ «Գնացել է հանգստանալու»։ Հարցին՝ մտադի՞ր է արդյոք Ալեքսանդր Սարգսյանը վերադառնալ Հայաստան, որդին ասաց․ «Մտադիր է, ո՞նց մտադիր չի»։
Factor.am-ի հարցին, թե երկրից դուրս գնալուց հետո արդյոք Ալեքսանդր Սարգսյանը հանդիպե՞լ է Չեխիայում հայտնաբերված որդուն՝ Ֆրանկլին Գոնսալես անվան տակ թաքնված Նարեկ Սարգսյանին, Հայկ Սարգսյանն ասաց՝ այո՛։
Հստակեցնող հարցին, թե հենց նրա գործի համա՞ր է լքել երկիրը, որդին կրկին դրական պատասխանեց։
Հիշեցնենք, որ Ալեքսանդր Սարգսյանը մեղադրվում է խարդախության համար, նրա նկատմամբ խափանման միջոց էր ընտրվել չհեռանալու մասին ստորագրությունը։ Սակայն հետո համացանցում հայտնվեց լուսանկար, որը փաստում էր, որ Սարգսյանը լքել է ՀՀ տարածքը։ ԱԱԾ-ն էլ հայտարարեց, որ Սերժ Սարգսյանի եղբորը՝ Ալեքսանդր Սարգսյանին թույլատրել է որոշ ժամանակով հեռանալ երկրից:
Լիլիթ Շաբոյան
