24.11.2024 | 13:22
ՏԿԵ նորանշանակ նախարարն ընտրվել է ՔՊ Արմավիրի տարածքային կազմակերպության խորհրդի նախագահ
Ոչ մի օտարերկրյա ուժ ներգրավված չի եղել Հայաստանում տեղի ունեցած հեղափոխությանը. Նիկոլ Փաշինյան
Տնտեսություն
11.04.2019 | 16:34
Ոչ մի օտարերկրյա ուժ ներգրավված չի եղել Հայաստանում տեղի ունեցած հեղափոխությանը: Ստրասբուրգում այս մասին հայտարարեց ՀՀ վարչապետ Նիկոլ Փաշինյանը՝ պատասխանելով ԵԽԽՎ պատվիրակներից մեկի հարցին:
«Երբեմն այս կապակցությամբ հանրությունը կարող է ականատես լինել տարօրինակ բանավեճերի: Որովհետև երբ, օրինակ, իմ այցերի կամ ասուլիսների ընթացքում փորձում են ասել, որ Հայաստանում տեղի է ունեցել «գունավոր հեղափոխություն», ես ամեն անգամ հարկ եմ համարում ընդգծել, որ մեզ մոտ տեղի է ունեցել ոչ թե գունավոր, այլ սիրո և համերաշխության հեղափոխություն: Եվ այս բառերի տակ, բնականաբար, խոսքը քաղաքական ենթատեքստի մասին է»,- ասաց նա:
Վարչապետն ընդգծեց, որ Հայաստանում տեղի ունեցած հեղափոխության մեջ որևէ արտաքին քաղաքական ուժի ներգրավվածութուն չի եղել. «Բացառվում է, որ որևէ մեկը կարողանա ցույց տալ որևէ արտաքին ուժի ներգրավվածություն մեր ներքին գործընթացների մեջ: Սա մեզ համար, կներեք, ազգային արժանապատվության խնդիր է և անձամբ ինձ համար էլ անձնական արժանապատվության խնդիր է: Եվ շատ կարևոր է արձանագրել, որ ժողովրդավարությունն իսկապես բխում է մեր ժողովրդի մտածելակերպից»:
Նրա խոսքով՝ մինչև հիմա էլ միջազգային մամուլում տեղ են գտնում հրապարակումներ, որ հնարավոր է, այնուամենայնիվ, գուցե կա աշխարհաքաղաքական, արտաքին քաղաքական ինչ-որ ենթատեքստ. «Ես կարծում եմ, որ ամեն օրվա հետ բոլորը համոզվում են, որ ամեն ինչ հենց այնպես է եղել, ինչպես ես ասել եմ: Հայաստանում տեղի ունեցած հեղափոխությունը որևէ երկրի դեմ չէ, որևէ կազմակերպության դեմ չէ, Հայաստանի ժողովուրդը հեղափոխություն իրականացրել է հանուն իր ազատ ու երջանիկ ապագայի»:
Ըստ Նիկոլ Փաշինյանի՝ Հայաստանը մտադիր է հարաբերությունները զարգացնել միջազգային բոլոր գործընկերների հետ:
«Հայաստանը ԵՏՄ անդամ է, մենք նախագահում ենք այս պահին այդ կազմակերպությունում, և մեզնից կախվածն անելու ենք՝ այդ կազմակերպությունն առավել արդյունավետ դարձնելու համար: Ռուսաստանի հետ մեր հարաբերությունները կրում են ռազմավարական բնույթ, և մենք ամեն ինչ անելու ենք այդ հարաբերությունները զարգացնելու համար: Անվտանգության համակարգի առումով՝ մենք ՀԱՊԿ-ի անդամ ենք, և ամեն ինչ անելու ենք՝ այդ կազմակերպությունը և այդ կազմակերպությանը մեր անդամակցությունն առավել արդյումավետ դարձնելու համար: ԵՄ-ի հետ այսօր ունենք հրաշալի հարաբերություններ ու դա ունի շատ կոնկրետ պատճառ: Խնդիրն այն է, որ Համապարփակ և ընդլայնված համագործակցության մասին պայմանագիրը, նրա բովանդակությունը լիարժեք կերպով համընկնում է մեր Կառավարության ունեցած օրակարգի հետ: Այն բարեփոխումների օրակարգի հետ, որ մենք մտադիր ենք իրականացնել մեր երկրում»,- շեշտեց ՀՀ վարչապետը:
