22.05.2026 | 12:37
Արման Թաթոյանի ասուլիսը
Անցումային արդարադատության մասին հայտարարված կարգախոսներն իրականություն չեն դառնում հեղափոխությունից մեկ տարի անց․ Նարինե Դիլբարյան․ ՏԵՍԱՆՅՈՒԹ
Քաղաքականություն
11.04.2019 | 17:09
«Ժառանգություն» կուսակցության նորընտիր փոխնախագահ Նարինե Դիլբարյանն այսօր հրավիրված մամուլի ասուլիսի ժամանակ, անդրադառնալով թավշյա հեղափոխությունից հետո ներքաղաքական զարգացումներին, նշեց, որ տեղի ունեցածը ցույց է տալիս, որ ժամանակ տալուց բացի պետք է անցնել կուսակցական գործունեության, այսինքն` ցույց տալ գաղափարների այն տեղապտույտը, որն այսօր կատարվում է:
«Ուստի, կարծում եմ՝ «Ժառանգություն» կուսակցությունը մնացյալ ազատական և ժողովրդավարական, այսինքն` իր սկզբունքները կիսող կուսակցությունների հետ կփորձի լուրջ դերակատարում ունենալ Հայաստանի ներքին և արտաքին քաղաքական դաշտում՝ միշտ երևան հանելով սկզբունքների և գործելակերպի հակասությունը, եթե այն, իհարկե, առկա է»,- ասաց նա:
Վերջինիս խոսքով՝ նրա՝ կառավարման համակարգում ստեղծված ճգնաժամը, որն առկա է և արձանագրվել էր կուսակցության 12-րդ համագումարի բանաձևում, երևան է հանում իրական մտահոգությունները:
«Հասարակությունն առ այս պահը բաժանված է սևերի և սպիտակների, այսինքն՝ հեղափոխականների և հակահեղափոխականների, և կա գայթակղություն ցանկացած քննադատություն մեկնաբանել որպես հակահեղափոխական երևույթ։ Բայց դա իրականում բնավ այդպես չէ: Հակահեղափոխականությունը, ընդհակառակը, սխալ քայլերի մասին լռելն է, և սխալները շտկելու ճանապարհներ չառաջարկելը: «Ժառանգությունը» որդեգրել է հենց այդ ճանապարհը՝ առաջարկել ուղիներ, մեթոդներ, գաղափարներ և սկզբունքներ, որոնց միջոցով մենք կկարողանանք իրականացնել իսկապես ազատական և ժողովրդավարական Հայաստանի տեսլականը, որը դրված էր հեղափոխության հիմքում»,- ասաց «Ժառանգության» փոխնախագահը:
Վերջինիս խոսքով, թեև արդեն գրեթե մեկ տարի է անցել թավշյա հեղափոխությունից, սակայն անցումային արդարադատության մասին ի սկզբանե հայտարարված կարգախոսներն իրականություն չեն դառնում, իսկ քաղաքական լյուստրացիան, որի մասին խոսվում էր նախորդ տարվանից, այդպես էլ տեղի չունեցավ։
Մանրամասները՝ տեսանյութում։
Աղավնի Սուքիասյան
