18.10.2026 | 15:28
Հայաստանում ձմեռային զորակոչը կմեկնարկի նոյեմբերի 16-ին․ հայտնի են զորակոչի և զորացրման ժամկետները
«Հայաստանի համար նոր օր է բացվել»՝ Հայոց ցեղասպանության հիշատակի երեկո ԱՄՆ-ի Կոնգրեսում. VOA
Քաղաքականություն
10.04.2019 | 10:36
«Հայաստանի համար նոր օր է բացվել», հայտարարեց իր խոսքում կոնգրեսական Ջեքի Սփիրը՝ ելույթ ունենալով ԱՄՆ-ի Կոնգրեսում անցած Հայոց ցեղասպանության հիշատակի երեկոյին. գրում է amerikayidzayn.com-ը:
«Հայաստանի համար նոր, հրաշալի օր է բացվել վարչապետ Փաշինյանի հետ, ում տիկնոջը մենք պատիվ ունեինք հյուրընկալելու մեկ շաբաթ առաջ: Նրանց մասին մտածելիս միայն ես ակամա ժպտում եմ, ինչպես Փաշինյանին հաջողվեց երկիրը պայծառ ժողովրդավարության վերածել, եւ այդ ամենը խաղաղ, մարդիկ պարզապես պարում էին փողոցներում, մի կաթիլ արյուն չթափվեց», – նշեց կոնգրեսական Սփիրը, ում մայրը հայ էր: Կոնգրեսականը հայտարարեց, որ պատրաստվում է նամակով դիմել նաեւ նախագահ Դոնալդ Թրամփին՝ կոչ անելով ԱՄՆ-ի ղեկավարին ճանաչել Հայոց ցեղասպանությունը:
«Այս հարցում հայ համայնքն ունի գաղտնի զենք, – կատակեց Ջեքի Սփիրը, – անհրաժեշտ է, որ Քիմ Քարդաշյանը Թվիթերով կոչ անի Դոնալդ Թրամփին ճանաչել Հայոց ցեղասպանությունը»: Իսկ եթե լուրջ, ապա Միացյալ Նահանգները պարզապես պարտավոր է ճանաչել 20-րդ դարի առաջին ցեղասպանությունը, համոզված է կոնգրեսականը.
«Մեր երկիրը հանդես է գալիս մարդու իրավունքների պաշտպանի, ճշմարտությունը սատարողի դիրքերից եւ չկա որեւէ պատճառ, որ Հայոց ցեղասպանությունը ճանաչող բանաձեւը չընդունվի Կոնգրեսի Ներկայացուցիչների պալատում»:
Հայոց ցեղասպանության ճանաչման բանաձեւի համահեղինակ, ազդեցիկ դեմոկրատական կոնգրեսական Ադամ Շիֆն իր ելույթում նույնպես նշեց, որ դա բարոյական հրամայական է: «Չէ՞ որ ցեղասպանության ժխտումը, Էլի Վիզելի բնորոշմամբ, կրկնակի սպանություն է», – նշում է Շիֆը, ավելացնելով, որ այդ ժխտման քաղաքականությունն այսօր բռնությունների եւ մարդկային կյանքերի կորուստների է վերածվել Լեռնային Ղարաբաղում: Ղարաբաղին ուղղվող ամերիկյան օգնության հարցը երեքշաբթի առավոտյան Կոնգրեսում բարձրացրել էր նաեւ Կոնգրեսական Բրադ Շերմանը, ով լսումների ընթացքում հավաստիացում ստացավ ԱՄՆ-ի կառավարությունից, որ Միացյալ Նահանգները նախատեսում է ֆինանսական միջոցներ ուղղել Ղարաբաղում ականազերծման աշխատանքներ իրականացնելու նպատակով:
Ինչ վերաբերում է Հայոց ցեղասպանությանը, որը պաշտոնական Անկարան ժխտում է, ապա, ըստ կոնգրեսական Շերմանի, այն պատմական փաստ է, որի ճանաչումն անհրաժեշտ է նաեւ Թուրքիային, որն այդ դեպքում բոլորովին այլ երկիր կդառնա.
«Պատկերացրեք, ո՞վ կցանկանար դաշնակիցը լինել Գերմանիայի, եթե այն հերքեր Ողջակիզումը»:
Հայաստանի հետ բարեկամության Կոնգրեսի խմբի համանախագահ կոնգրեսական Ֆրանք Փալոնն իր կողմից կրկին անդրադարձավ Հայաստանի «Թավշյա հեղափոխությանը», որն, իր խոսքով, պետք է գնահատվի Միացյալ Նահանգների կողմից, քանի որ մինչ բազմաթիվ նախկին խորհրդային պետություններ գնում են բռնատիրության ուղիով, Հայաստանին հաջողվել է ճիշտ ուղի ընտրել:
Նշենք, որ երկուշաբթի Կոնգրեսի Ներկայացուցիչների պալատում շրջանառության մեջ մտած Հայոց ցեղասպանության ճանաչման բանաձեւը, որը համահեղինակել են դեմոկրատական կոնգրեսական Ադամ Շիֆն ու հանրապետական կոնգրեսական Գուս Բիլիրակիսը, արդեն արժանացել է յոթ տասնյակից ավելի կոնգրեսականների աջակցության: Ամերիկայի Հայ դատի գրասենյակի հաղորդմամբ, Հայոց ցեղասպանության ճանաչման վերաբերյալ բանաձեւ է ներկայացվել նաեւ Կոնգրեսի վերին պալատում՝ Սենատում: Դրա համահեղինակներն են ազդեցիկ դեմոկրատական սենատոր Բոբ Մենենդեզը եւ հանրապետական սենատոր Թեդ Քրուզը: Նշենք նաեւ, որ ԱՄՆ-ի Կոնգրեսը 1975 եւ 1984 թվականներին ընդունել է Հայոց ցեղասպանությունը ճանաչող բանաձեւեր: 1981 թվականին իր ուղերձում Հայոց ցեղասպանությունը ճանաչել էր նաեւ ԱՄՆ-ի 40-րդ նախագահ Ռոնալդ Ռեյգանը:
