17.01.2026 | 16:50
Երևանում վագոն-տնակ է այրվել
ՀՀ դեսպան Հասմիկ Տոլմաջյանն այցելել է Ֆրանսիայի Արևելյան լեզուների և քաղաքակրթությունների ազգային ինստիտուտ
Քաղաքականություն
09.04.2019 | 19:22
Ապրիլի 5-ին Ֆրանսիայում ՀՀ դեսպան Հասմիկ Տոլմաջյանն այցելեց Ֆրանսիայի Արևելյան լեզուների և քաղաքակրթությունների ազգային ինստիտուտ (Institut National des Langues et Civilisations Orientales, INALCO), որտեղ հանդիպում ունեցավ ինստիտուտի նորանշանակ նախագահ Ժան-Ֆրանսուա Հուշեի (Jean-François Huchet) հետ: Հանդիպմանը մասնակցում էր նաև արևելյան լեզուների դպրոցի հայկական ամբիոնի վարիչ Անահիտ Տոնապետյանը:
Այս մասին ՀՀ ԱԳՆ լրատվական ծառայության մեջ տարածած հաղորդագրության մեջ ասված է․
«Շնորհակալություն հայտնելով ընդունելության համար՝ դեսպան Տոլմաջյանը շնորհավորեց Ժան-Ֆրանսուա Հուշեին կրթական հաստատության ղեկավարի պաշտոնում նշանակվելու կապակցությամբ և հաջողություններ մաղթեց նրա հետագա գործունեությունում: Կարևորելով հայկական ամբիոնի ավելի քան երկուհարյուրամյա գործունեությունը՝ դեսպանը նշեց, որ այն իրավամբ համարվում է Հայաստանից դուրս հայագիտական ուսումնասիրությունների ամենանշանակալի կենտրոններից մեկը:
Հանդիպմանը զրուցակիցները քննարկեցին նաև Հայաստանում գործող գիտական և կրթական հաստատությունների հետ առկա և ապագա համագործակցության հնարավոր ծրագրերը»:
Տեղեկանք․ Արևելյան լեզուների և քաղաքակրթությունների ազգային ինստիտուտը հիմնադրվել է 1669թ-ին Ժան-Բատիստ Կոլբերի կողմից, որպես «Երիտասարդների համար լեզուների դպրոց»: Հայերենի առաջին դասերը Ֆրանսիայի արևելյան լեզուների դպրոցում պաշտոնապես մեկնարկել են 1799թ-ին: Հայագիտության ամբիոնը ստեղծվել է 1812թ-ին, որի առաջին ղեկավարն է եղել ականավոր լեզվաբան Հակոբ Շահան Ջրպետյանը (Jacques Chahan de Cirbied):
