Վատ է, որ ԱԱԾ-ն է զբաղվելու ֆեյքերով. Էդմոն Մարուքյան. ՏԵՍԱՆՅՈՒԹ

«Սահմանադրությամբ վարչապետը չի կարող որևէ իրավապահ մարմնի ասի, որ գործ հարուցեն։ Կարող է գրավոր դիմել, ներկայացնել հանցագործության մասին տեղեկություններ՝ ինչպես դուք կամ ես, և գործը հարուցվի կամ չհարուցվի»,- այսօր ԱԺ-ում պատասխանելով լրագրողների հարցերին՝ ասաց «Լուսավոր Հայաստան» խմբակցության ղեկավար Էդմոն Մարուքյանը։

Հիշեցնենք, որ Փաշինյանը երեկ իր ֆեյսբուքյան էջում գրել էր․ «Չեմ ուզում մազոխիստի տպավորություն թողնել, բայց ուզում եմ տեղեկացնել, որ իմ անմիջական ցուցումով քրեական գործ է հարուցվել իմ մի մերձավոր ազգականի թույլ տված ենթադրյալ չարաշահման փաստի առիթով: Կասկած չկա, որ գործը լիարժեք կքննվի և մեղավորները կենթարկվեն օրենքով նախատեսված պատասխանատվության»։

Մարուքյանը կարծիք հայտնեց, որ ցուցում տալու հետ կապված թերևս վարչապետը այլ բան կարող է նկատի ունեցած լինել և հորդորեց դիմել Փաշինյանին՝ խնդրելով պարզաբանել, թե ինչ է նկատի ունեցել։ Անդրադառնալով ԱԱԾ-ին տրված Փաշինյանի երեկվա հանձնարարականին՝ կոշտ միջոցներ ձեռնարկել ֆեյքերի և մեդիամանիպուլյացիաների դեմ, Մարուքյանն ասաց․ «Ֆեյքերից ամենաշատը տուժած կուսակցությունը մենք ենք, երևի ես եմ։ Բայց դրա լուծումը ես չեմ տեսնում, դրա լուծումը մեր քաղաքացիական հասարակության զարգացման և մեդիագրագիտության մեջ է»։

Նա նաև կարծիք հայտնեց, որ ֆեյքերի դեմ պայքարը ԱԱԾ-ի գործառույթը չէ․ «ԱԱԾ-ի գործառույթ կլինի դա այն դեպքում, երբ թշնամին փորձի մեդիամանիպուլյացիաների միջոցով հանրային կարծիքի վրա ազդել, դա կարող է լինել ԱԱԾ գործառույթ։ Բայց որ երկրի ներսում մարդիկ կանտորաներ են պահում, որ իրենց գովեն կամ իրենց հակառակորդներին մեդիադաշտում ոչնչացնեն, դա ԱԱԾ գործառույթ չէ»։

Մանրամասները՝ տեսանյութում:

Մհեր Արշակյան