Քրգործ հարուցելու ցուցում տալու իրավասությունը դատախազինն է. ՄԻՊ-ը վարչապետի ցուցում տալու մասին. ՏԵՍԱՆՅՈՒԹ

Մարդու իրավունքների պաշտպան Արման Թաթոյանը դեռ չի ծանոթացել վարչապետ Նիկոլ Փաշինյանի այն գրառմանը, ըստ որի, իր ցուցումով քրգործ է հարուցվել իր ազգականի նկատմամբ։

«Ծանոթ չեմ գրառմանը, սակայն կարող եմ ասել, որ Քրեական դատավարության մասին օրենսգիրքն ունի ազատությունից զրկման մեխանիզմներ և նախատեսել է,  թե ով ինչ հանձնարարականներ և ցուցումներ կարող է տալ»,- այսօր Ազգային ժողովում լրագրողների հետ ճեպազրույցում ասաց Թաթոյանը։

Հարցին՝ վարչապետը կարո՞ղ է արդյոք ցուցում տալ, Արման Թաթոյանը պատասխանեց․ «Քրեական դատավարության օրենսգիրքը քրեական գործ հարուցելու ցուցում տալու լիազորություն վերապահում է բացառապես դատախազին և ոչ վարչապետին»։

Անդրադառնալով վարչապետի՝ երեկ Կառավարությունում տված  հրահանգին՝ կապված ֆեյք լուրերի դեմ պայքարի հետ, Թաթոյանն ասաց, որ անանուն մնալը համարվում է մարդու իրավունքներից մեկը և կան միջազգային ուղեցույցներ դրա հետ կապված։

«Կարծում եմ, այս հարցը ուղիղ մեր ուշադրության ներքո է, առանձնակի ուշադրությամբ հետևելու ենք։ Ատելության խոսքը, բռնության և սպառնալից խոսքերը տարածում են նաև կեղծ էջերը։ Իսկ ինչ վերաբերում է ֆեյք լուրերի դեմ պայքարի համար ԱԱԾ-ին տրված հրահանգին՝ ապա պետք է ասեմ, որ  ըստ իրավասության, պետք է այդ խնդրով յուրաքանչյուր մարմին զբաղվի և այս հարցում կիսում եմ իմ իրավապաշտպան  գործընկերների իրավունքը և կրկնում եմ՝ մարդն ունի առցանց հարթակում անանուն մնալու իրավունք»,- ասաց ՀՀ ՄԻՊ-ը:

Մանրամասները՝ տեսանյութում։