04.04.2026 | 11:15
Իսակովի պողոտայում 3 ավտեմեքենա է բախվել․ վարորդներից մեկը հոսպիտալացվել է
Երբ մենք պատրաստ ենք պատերազմի, դա հիմնական գրավականն է խաղաղություն ունենալու համար․ Էդմոն Մարուքյան
Քաղաքականություն
02.04.2019 | 16:38
Այսօր՝ ապրիլի 2-ին, «Եռաբլուր» պանթեոն էին այցելել «Լուսավոր Հայաստան» կուսակցության անդամները։
Լրագրողների հետ զրույցում, անդրադառնալով ապրիլյան պատերազմից քաղած դասերին, կուսակցության նախագահ Էդմոն Մարուքյանն ասաց, որ ապրիլյան պատերազմը մեծ դաս էր մեր պետության, հայ ժողովրդի համար, և կապ չունի մարդը Հայաստանում է ապրում, թե՝ այլ երկրում:
«Դա մեզ համար մեծ դաս է եղել, որ մեր տնային աշխատանքը լավ կատարենք, մենք տեսել, լսել ենք լոզունգներ, հայտարարություններ, բայց երբ պահը եկավ, բազմաթիվ միֆեր քանդվեցին։ Հիմա պետք է հզորացնել բանակը, տնտեսությունը, որը բանակի թիկունքն է և միշտ պատրաստ լինել նոր պատերազմի, որը մեզ խաղաղություն կբերի։ Երբ մենք պատրաստ ենք պատերազմի, դա հիմնական գրավականն է խաղաղություն ունենալու համար», – ասաց Էդմոն Մարուքյանը՝ հավելելով, որ Արցախի խնդիրը վերաբերում է բոլոր հայերին և միայն Հայաստանով ու Արցախով չի սահմանափակվում:
Անդրադառնալով Նյու Յորքում հայ համայնքի հետ հանդիպման ժամանակ պաշտպանության նախարար Դավիթ Հարությունյանի այն հայտարարությանը, որ ինքը «տարածքներ՝ խաղաղության դիմաց» սկզբունքը վերաձևակերպել է «նոր պատերազմ՝ նոր տարածքների դիմաց» սկզբունքով, Մարուքյանն ասաց․ «Մենք պետք է աշխատենք, որ խաղաղ կարգավորման համար բանակցություններն ընթանան, բայց եթե մեզ վրա հարձակվեն, ապա պետք է մտածենք, որ ոչ թե հողեր կորցնենք, այլ նոր տարածքներ ազատագրենք և սրա մասին էր պաշտպանության նախարարի հայտարարությունը, ոչ թե զիջումներ անենք, որ խաղաղություն ունենանք, այլ հակառակորդ կողմը պետք է մտածի, որ եթե գնա պատերազմի, նման արկածախնդրության, ապա կկորցնի նոր տարածքներ»:
Պատգամավորը հավելեց, որ ամեն ինչ պետք է անել, որ բանակցություններն ընթանան, որովհետև խնդիրը ռազմական լուծում չունի:
