Հայաստանը խաղաղություն արտահանող երկիր է և մերժում է ռազմական ցանկացած լուծում. Շարմազանով

ՀՀ ԱԺ փոխնախագահ Էդուարդ Շարմազանովն օգոստոսի 23-ին ընդունել է ՀՀ-ում Արգենտինայի Հանրապետության արտակարգ և լիազոր դեսպան Գոնզալո Ուրրիոլաբեիտիային:

ԱԺ-ից  հայտնում են, որ ողջունելով դեսպանին՝ ՀՀ ԱԺ փոխնախագահը նշել է, որ վեցերորդ գումարման Ազգային ժողովում արդեն ձևավորվել են բարեկամական խմբերը, և ինքը շարունակելու է գլխավորել Արգենտինայի հետ բարեկամական խումբը, որը պատկառելի կազմ ունի:

Էդուարդ Շարմազանովը բարձր է գնահատել դեսպանի շահագրգիռ գործունեությունը հայ-արգենտինական հարաբերությունների զարգացման և խորացման գործում: ՀՀ ԱԺ փոխնախագահը, կարևորելով խորհրդարանական դիվանագիտության դերը, ընդգծել է միջազգային կառույցներում բարեկամ երկրների համագործակցության նշանակությունը:

Էդուարդ Շարմազանովը փաստել է, որ նախորդ դարասկզբին ապաստան տալով հայերին՝ Արգենտինան դարձել է նրանց երկրորդ հայրենիքը և հետագայում վճռական քայլեր ձեռնարկել Հայոց ցեղասպանության ճանաչման և դատապարտման համար: ՀՀ ԱԺ փոխնախագահի խոսքով՝ Հայոց ցեղասպանության ճանաչման հարցը թևակոխում է նոր փուլ՝ թուրքական ժխտողականության դեմ պայքարի փուլը:

Բարձր գնահատելով Արգենտինայի հավասարակշռված դիրքորոշումը Լեռնային Ղարաբաղի հիմնահարցի շուրջ՝ ՀՀ ԱԺ փոխնախագահը նշել է, որ Հայաստանը խաղաղություն արտահանող երկիր է և մերժում է ռազմական ցանկացած լուծում:

Էդուարդ Շարմազանովը, կարևորելով փոխայցելությունների դերը երկկողմ հարաբերությունների զարգացման գործում, իր արգենտինացի գործընկերներին հրավիրել է Հայաստան:

Գոնզալո Ուրրիոլաբեիտիան շնորհակալություն է հայտնել ընդունելության համար և կարևորել խորհրդարանական համագործակցության դերը բարեկամ երկրների միջև հարաբերությունների զարգացման գործում: Դեսպանը նշել է, որ պետք է օգտագործել խորհրդարանական բոլոր ձևաչափերը՝ հարաբերությունների համակողմանի զարգացման համար: Դեսպանի խոսքով՝ հայկական համայնքի ներկայությունն Արգենտինայում իր ազդեցությունն է ունեցել երկու երկրների բարեկամության կայացման և կապերի խորացման գործում:

Հանդիպման ավարտին Գոնզալո Ուրրիոլաբեիտիան նշել է, որ այս տարի լրանում է Արգենտինայի և Հայաստանի միջև դիվանագիտական հարաբերությունների հաստատման 25 տարին, և դեսպանատունը կազմակերպելու է մի շարք միջոցառումներ, որոնց մասնակցելու հրավիրել է ՀՀ ԱԺ փոխնախագահին: