Հենց ուրբաթ օրը պետք է լինեինք Արցախում, երբ զուգահեռ ընթանում էր Փաշինյան-Ալիև հանդիպումը. Մակունց. ՏԵՍԱՆՅՈՒԹ

«Իմ քայլը» խմբակցության պատգամավորները շուրջ երկու ժամ փակ քննարկում անցկացրեցին խորհրդարանում: Հանդիպումից հետո լրագրողները խմբակցության ղեկավար Լիլիթ Մակունցից հետաքրքրվեցին՝ հնարավո՞ր է՝ այն կապված էր նախորդ քառօրյայի վերջին օրը տեղի ունեցած իրադարձության հետ, երբ իր գլխավորությամբ պատգամավորները մեկնեցին Արցախ՝ անտեսելով կարևոր քվեարկությունը: Մակունցը նախ նշեց, որ խմբակցությունում պարբերաբար խորհրդակցական հանդիպումներ են տեղի ունենում, և այս անգամ հանդիպումը վերաբերում էր Արցախ այցին:

«Մենք՝ որպես պատվիրակություն, տեղեկացնում էինք, թե ինչ է տեղի ունեցել, և ներկայացնում մանրամասները»,- ասաց նա:

Ինչ վերաբերում է քվեարկության հետ կապված խնդրին, «Իմ քայլը» խմբակցության ղեկավարը նշեց, որ դա տեխնիկական է եղել:

«Տրամաբանական չէ, որ առաջին ընթերցմամբ միաձայն քվեարկությունից հետո երկրորդ ընթեցման ժամանակ հարցը չցանկանայինք անցկացնել»,- ասաց նա՝ նշելով, որ արագ շտկեցին և այնպես չստացվեց, որ դա եղավ ի հաշիվ Արցախ այցի:

Մակունցը նշեց, որ կարևոր էր հենց ուրբաթ օրը լինել Արցախում, երբ զուգահեռ ընթանում էր Փաշինյան-Ալիև հանդիպումը:

«Նախ՝ ուրախ եմ, որ համընկել էր Արցախ այցելության օրը, այցելությունը ենթադրում էր ԱԺ-ի օրենսդիր մարմնի հետ հանդիպում, նաև հանձնաժողովների, Արցախի նախագահի հետ հանդիպումը: Սա, ըստ էության, առաջին պաշտոնական այցն էր Արցախ: Որոշ հանձնաժողովների հետ պայմանավորվածություներ կան՝ հետագայում աշխատելու հետ կապված: Մեզ համար չափազանց կարևոր էր ապահովել միասնականության շարունակությունը և այս դինամիկան չպետք է նվազի»,- ասաց նա:

Մանրամասները՝ տեսանյութում:

Նարեկ Կիրակոսյան