Ադրբեջանի ԱԳՆ-ն արձագանքել է Դավիթ Տոնոյանի հայտարարությանը

Ադրբեջանի ԱԳՆ-ն արձագանքել է ՀՀ պաշտպանության նախարար Դավիթ Տոնոյանի՝ Նյու Յորքում հայ համայնքի ներկայացուցիչների հետ հանդիպմանը հնչեցրած հայտարարությանը, որ «խաղաղություն՝ տարածքների դիմաց» բանաձևը փոխվում է «նոր պատերազմ նոր տարածքների դիմաց» բանաձևով: Բաքուն սա «ագրեսորական» և «նվաճողական» են որակել:

«Հայաստանի պաշտպանության նախարարի այս հայտարարությունը, որը հնչել է Վիեննայում Հայաստանի վարչապետի և Ադրբեջանի նախագահի հանդիպումից անմիջապես հետո, բացահայտ սադրիչ բնույթ է կրում և դեմ է հակամարտության խաղաղ կարգավորմանն ուղղված միջազգային հանրության ջանքերին՝ ի դեմս ԵԱՀԿ Մինսկի խմբի համանախագահների»,- ասված է Ադրբեջանի ԱԳՆ-ի հայտարարությունում:

Բաքվում նաև վստահեցրել են, թե Ադրբեջանը, «ի տարբերություն Հայաստանի, այլ պետություններին տարածքային պահանջներ չի ներկայացնում և նպատակ չունի բռնազավթել ինչ-որ տարածք»:

«ՄԱԿ-ի ԱԽ բանաձևերին համապատասխան՝ Ադրբեջանը պահանջում է անհապաղ դուրս բերել Հայաստանի զորքերը Ադրբեջանի՝ միջազգայնորեն ճանաչված տարածքներից: Ադրբեջանի բոլոր ջանքերը՝ միջազգային հանրության աջակցությամբ, ուղղված են այդ նպատակին հասնելուն: Հակառակ դեպքում, Ադրբեջանը պատրաստ է իր տարածքներն ազատագրել ցանկացած միջոցներով՝ ղեկավարվելով միջազգային իրավունքի համապատասխան նորմերով և սկզբունքներով, ինչպես նաև ՄԱԿ-ի Կանոնակարգով»,- մասնավորապես, ասված է Ադրբեջանի ԱԳՆ-ի հայտարարությունում:

Հիշեցնենք, որ Նյու Յորքում հանդիպման ժամանակ պաշտպանության նախարար Դավիթ Տոնոյանն ասել էր. «Ես` որպես պաշտպանության նախարար, ասում եմ՝ «տարածքներ՝ խաղաղության դիմաց» ձևաչափը վերաձևակերպել եմ, մենք հակառակն ենք անելու՝ «նոր պատերազմ՝ նոր տարածքների դիմաց»,- ասել է նախարարը: