03.09.2026 | 18:46
Ընտանեկան բռնությունը կդիտարկվի առանձին հանցագործություն․ Արփինե Սարգսյանը ներկայացրել է օրենսդրական նախաձեռնությունը
Երուսաղեմի և Բաքվի ռազմատեխնիկական համագործակցությունն ուղղված չէ Հայաստանի դեմ. НВО
Քաղաքականություն
29.03.2019 | 18:11
Երուսաղեմի և Բաքվի ռազմատեխնիկական համագործակցությունն ուղղված չէ երրորդ երկրների դեմ: Այս մասին ասված է Իսրայելի կողմից Ադրբեջանին սպառազինություն վաճառելու և դրան Հայաստանի արձագանքի մասին «Независимое военное обозрение» պարբերականում հրապարակված հոդվածում:
Հոդվածագիրը նշում է, որ իսրայելական զենքի խոշորագույն արտահանողների թվում Ադրբեջանը երրորդն է՝ Հնդկաստանից և Վիետնամից հետո: Տարբեր աղբյուրների գնահատմամբ՝ 2017 թվականին Երուսաղեմը Բաքվին առնվազն 140 մլն դոլարի սպառազինություն է վաճառել: Մատակարարումներում մեծ տեղ են զբաղեցնում տարբեր տեսակի անօդաչուները, այդ թվում՝ մինչև 1.000 կմ գործողության շառավղով նորագույն հարվածային մոդիֆիկացիաները:
Ընդ որում՝ իսրայելական ամենահզոր դրոններից մեկի արտադրությունն արտոնագրով իրականացվում է ադրբեջանական գործարաններից մեկում: Հավանաբար, առաջիկայում կյանքի կկոչվի նաև բազմապրոֆիլ թռչող սարքերի արտադրության մասին Ադրբեջանի ՊՆ-ի և իսրայելական Aeronautics կոնցեռնի միջև կնքված պայմանագիրը:
Միաժամանակ, ըստ աղբյուրի, Ադրբեջանի Պաշտպանության նախարարության սպառազինության կազմում կան «Բարակ 8» զենիթահրթիռային համալիրներ, «CARDOM» ինքնագնաց ականանետեր, «Գրին Փայն» հակահրթիռային ռադիոտեղորոշիչ համակարգեր, B-300 նռնականետեր, «Երկաթե գմբեթ» հակահրթիռային պաշտպանության համալիրներ:
Հոդվածի հեղինակ Զախար Գելմանը ռազմատեխնիկական ոլորտում Իսրայելի և Ադրբեջանի հարաբերությունները բնորոշում է գործընկերային՝ և՛ տակտիկական, և՛ ռազմավարական առումներով: «Եվ չնայած այդ դեպքում գործընկերության աստիճանը բավական բարձրարժեք է, երկկողմ հարաբերություններն այս ոլորտում, ամեն դեպքում, չեն վերաճել դաշնակցայինի»,- գրում է նա:
Նշվում է, որ ռազմական ոլորտում Երուսաղեմի և Բաքվի համագործակցությունը որոշակի մտահոգություններ է առաջացնում Երևանի մոտ, սակայն Իսրայելի իշխանությունները շարունակում են վստահեցնել, որ իրենց զենքն ուղղված չէ Հայաստանի դեմ:
Իսրայելն իր հերթին մտահոգված է Հայաստանում իրանական ազդեցության ուժեղացման առիթով: Եվ չնայած ռազմական ոլորտում Երևանի ու Թեհրանի միջև լուրջ համագործակցություն չկա, Երուսաղեմն ուշադիր հետևում է իրադրությանը:
Զախար Գելմանը ուշադրություն է հրավիրում նաև այն փաստի վրա, որ Ադրբեջանը մինչ օրս Իսրայելում դեսպանատուն չի բացել, մինչդեռ Հայաստանը վերջին շրջանում պարբերաբար հայտնում է նման մտադրության մասին:
