Մենք տեսնում ենք, թե ինչպես է բանակցություններից առաջ մեր ռազմավարական դաշնակիցը միանգամից եթերը ողողում մի քանի հակավարչապետական նյութերով․ Անուշ Սեդրակյան. ՏԵՍԱՆՅՈՒԹ

Ես շատ մեծ հույս ունեմ, որ վարչապետ Նիկոլ Փաշինյանն այն հարցերի շուրջ, որոնց մասին խոսում է և՛ Արցախում, և՛ Հայաստանում, շատ հանգիստ և արժանապատիվ խոսի նաև Իլհամ Ալիևի հետ, իսկ թե ինչ կարձագանքի Ալիևը, դա արդեն հարցի մյուս կողմն է:

Այս մասին այսօր հրավիրված մամուլի ասուլիսի ժամանակ, անդրադառնալով Վիեննայում Փաշինյան-Ալիև հանդիպմանը, ասաց լեզվաբան  Նարինե Դիլբարյանը։

Ասուլիսին ներկա քաղաքագետ Անուշ Սեդրակյանն էլ այդ հանդիպման վերաբերյալ հարցը բաժանեց երկու մասի։

«Հարցը բաժանեմ երկու մասի՝ աշխարհաքաղաքական տեսանկյունից և ներքին տրամադրությունների տեսանկյունից: Աշխարհաքաղաքական տեսանկյունից վերջին երեք տարիներին աշխարհում տեղի են ունենում աննախադեպ իրադարձություններ: Մենք տեսանք վերջին իրադարձությունների զարգացման պարագծում, թե ինչպես գրչի մի հարվածով Թրամփն Իսրայելին բաշխեց Գոլանի բարձունքները: Եվ անկախ նրանից, թե ՄԱԿ-ի կողմից կամ ինչ այլ արձագանք կլինի, Գոլանի բարձունքները՝ Իսրայելի պարագայում, Ղրիմը՝ Ռուսաստանի պարագայում, մնալու են այդ երկրների կազմում: Հայաստանը գտնվում է ներկայում Ռուսաստանի դաշնակցային պարագծում: Մենք տեսնում ենք, թե ինչպես այդ բանակցություններից առաջ մեր ռազմավարական դաշնակիցը միանգամից եթերը ողողում է մի քանի հակավարչապետական նյութերով, ռեպորտաժներով՝ դրանով արդեն ցույց տալով, որ Ռուսաստանը չի պատրաստվում Հայաստանի դաշնակիցը լինել ղարաբաղյան բանակցությունների ֆորմատում»։

Ըստ քաղաքագետի՝ ներքին տրամադրությունների տեսանկյունից իրեն մի բան է շատ մտահոգում. վարչապետը գնում է բանակցությունների, նախ՝ այդ ֆորմատը չի քննարկվում հանրայնորեն, գոնե պետք է նա գնար բանակցությունների՝ թեկուզ առանց օրակարգի, իր թիկունքում ունենալով հանրային աջակցության տեսլական:

Մանրամասները՝ տեսանյութում։