Հասարակություն
29.03.2019 | 13:19
Երևանի ընդհանուր իրավասության դատարանում դատավոր Մեսրոպ Մակյանի նախագահությամբ դռնփակ ռեժիմով շարունակվում է Գագիկ Ծառուկյանի թիկնազորի նախկին պետ, «Բարգավաճ Հայաստան» խմբակցության պատգամավոր Էդուարդ Բաբայանի գործով դատական նիստը։ Ըստ մեղադրանքի՝ Վյաչելսավ Հարությունովը հանդիպել է ԲՀԿ առաջնորդ Գագիկ Ծառուկյանին, առանձին դահլիճում ընդհանուր հայտարարի չգալով՝ Հարությունովը Ծառուկյանի հասցեին հայհոյանք է հնչեցրել, որից հետո Էդուարդ Բաբայանը ծեծի է ենթարկել Վյաչեսլավ Հարությունովին: Վերջինը տեղափոխվել է «Արմենիա» բժշկական կենտրոն։ Քիչ առաջ նիստը 10 րոպեով ընդմիջվեց:
Լրագրողների հետ զրույցում Բաբայանի պաշտպան Արմեն Մելքոնյանն ասաց, որ դեռևս հրապարակվում են խոսակցությունների գաղտնալսումների ձայնագրությունները. «Էդտեղ Էդուարդ Բաբայան անունն ընդհանրապես չի շոշափվում։ Բազմաթիվ են հայհոյանքները։ Մի տեղ Էդո են ասում, իսկ թե ի՞նչ Էդո է։ Ձայնագրություններն ապացույցներ չեն»։
Ըստ պաշտպանի՝ խոսակցությունը տեղի է ունենում ընտանիքի անդամների միջև, այնտեղ հնչում է նաև «Գագո» անունը. «Ծառուկյան Գագիկին մասի՞ն է խոսքը, չգիտեմ։ Չեմպիոն դառնալու դեպքում Ծառուկյանը պարտավոր է մեքենա տալ, Հարությունովն ասում է կնոջը»:
Էդուարդ Բաբայանն էլ նշեց. «Ես էս դեպքի հետ կապ չունեմ։ Հիմա նորմալ հարաբերություններ ունեմ Հարությունովի հետ։ Ծեծը և բռնությունը որակում եմ շատ վատ: Ես չգիտեմ՝ իմ հետ կապված ինչի են սենց բաներ ուզում անեն, երևի երևացող մարդ եմ»։
Հիշեցնենք, որ Էդուարդ Բաբայանը մեղադրվում է 50-ամյա Վյաչեսլավ Հարությունովի առողջությանը դիտավորությամբ ծանր վնաս պատճառելու համար: Դեպքը տեղի է ունեցել 2018 թ. հուլիսի 2-ին: Բաբայանը նախ կալանավորվեց, ապա օգոստոսի 21-ին 20 մլն դրամ գրավի դիմաց ազատ արձակվեց:
Լիլիթ Շաբոյան
