Աշխատանքից ազատվեց Լոռու վերջին փոխմարզպետը. մարզպետի գնահատմամբ՝ նա լավ չի աշխատել

ՀՀ վարչապետ Նիկոլ Փաշինյանի թիվ 305-Ա որոշման համաձայն Արշակ Հովսեփյանն ազատվել է Լոռու մարզպետի տեղակալի պաշտոնից: Նախկին պաշտոնյան այս առիթով իր ֆեյսբուքյան էջում գրառում է կատարել՝ նշելով, որ իրեն աշխատանքից ազատել են՝ ոչ սեփական դիմումի համաձայն. «…Ես ազատվել եմ Լոռու մարզպետի տեղակալի պաշտոնից, ոչ իմ դիմումի համաձայն: Երևի թե իմ մասնագիտական հմտությունները և իմ գիտելիքներն ու մարդկային բարձր որակները չգնահատվեց և չզգացվեց դրա կարիքը։ Այնուամենայնիվ, ես բավականաչափ ուժ և կորով ներդրեցի ի փառս մարզի զարգացման, խնդիրների վերհանման և բարձրաձայնման։ Այս ամենը, դժբախտաբար, որակվեց որպես ոչ պրոֆեսիոնալիզմ…»:

Factor.am-ի հետ զրույցում Լոռու մարզպետ Անդրեյ Ղուկասյանն ասաց, որ Հովսեփյանին աշխատանքից ազատել են, քանի որ վերջինս չի արդարացրել իրենց հույսերը. «Իմ առաջարկությամբ վարչապետը մարզպետի տեղակալին ազատել է պաշտոնից: Ես գտնում եմ, որ ինքը չէր համապատասխանում տվյալ պաշտոնին: Հույսերը չարդարացրեց, անցել է մի քանի ամիս, սակայն աշխատանքները ես գնահատում եմ ոչ բավարար»:

Հիշեցնենք, որ Հովսեփյանն այդ պաշտոնում նշանակվել էր 2018 թվականի հոկտեմբերին: Մեր դիտարկմանը, որ շրջանառվող լուրերի համաձայն, մարզպետն աշխատանքից ազատում է հատկապես նախկին փոխմարզպետ, այժմ պատգամավոր Արամ Խաչատրյանի միջոցով մարզպետարանում աշխատանքի տեղավորված կադրերին, Ղուկասյանն արձագանքեց. «Չեմ մեկնաբանի, քանի որ նման բան չկա: Իմ համար կարևորը պրոֆեսիոնալիզմն է, այլ չափանիշ չկա»:

Նշենք, որ այս պահին Լոռու մարզը մնացել է առանց փոխմարզպետի: Աշխատանքից ազատվեց արդեն երրորդ փոխմարզպետը: Մարզի ղեկավարը վստահեցնում է, թե այդ պաշտոնի համար որևէ թեկնածու դեռ չունեն:

Տաթևիկ Ղազարյան