Եթե վաղը մեր տեղական կազմակերպությունները փակվեն, ի՞նչ ենք անելու, ասելու ենք՝ սխալվեցի՞նք․ Մանե Թանդիլյան․ ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցության պատգամավոր Մանե Թանդիլյանին զարմանք է պատճառում ԱԺ ամբիոնից հնչող քննադատությունների վերաբերյալ արձագանքները․ պատգամավորն ընդգծում է՝ կարծում էր այլ մակարդակի քննարկում պետք է ծավալվեր այդ ամբիոնից։

Անդրադառնալով  քննարկվող «Տեղեկատվական տեխնոլոգիաների ոլորտի պետական աջակցության մասին» Հայաստանի Հանրապետության օրենքում փոփոխություններ և լրացումներ կատարելու մասին օրենքի նախագծին՝ Մանե Թանդիլյանն ասաց, որ առաջարկվող  օրենքի փոփոխությունները թեև միտված են Հայաստանում ՏՏ ոլորտում գործունեություն ծավալող ընկերություններին հարկային արտոնություն տալուն, սակայն սահմանելով նույն արտոնությունը և՛ տեղական ընկերությունների, և՛ արտասահմանյան ընկերությունների դուստր ձեռնարկությունների համար, կարող ենք վնասել տեղական  ընկերություններին։

Ըստ պատգամավորի՝ այս օրենքի նախագծից կամ պետք է հանվի այդ դրույթը, կամ պետք է ամրագրվի պայմանով, որ օտարերկրյա ընկերությունների դուստր ձեռնարկությունները օգտվեն բացառությամբ այն դեպքի, երե առաջարկեն մի բան, որը տեղական ՏՏ ոլորտի ընկերությունները չեն կարողանա անել։

«Պետք է անել այնպես, որ այդ օտարերկրյա ընկերությունները չտանեն մեր տաղանդներին, խնդիր չհանդիսանան տեղական ընկերությունների համար։ Եթե վաղը կամ մյուս օրը մեր տեղական ընկերությունները փակվեն, ի՞նչ ենք անելու, ասելու ենք՝ վայ օրենքը սխա՞լ էր․ բայց չէ՞ որ արդեն վնաս ենք  հասցրել»,- ասաց պատգամավորը:

Մանրամասները՝ տեսանյութում։

Աղավնի Սուքիասյան