«Լիդիան Արմենիա»-ի ներկայացուցիչները մերժել են մասնակցել փորձաքննական աշխատանքներին. Էրիկ Գրիգորյան. ՏԵՍԱՆՅՈՒԹ

Ամուլսարի հարցով անկախ փորձաքննության արդյունքներն այս տարվա մայիս-հունիսին հայտնի կլինեն: ԱԺ-ում լրագրողների հետ զրույցում ասաց ՀՀ բնապահպանության նախարար Էրիկ Գրիգորյանը:

«Այս պահի դրությամբ ուսումնասիրություններ են կատարվում: Հենց այսօր միջազգային փորձագետները Հայաստանում են և տարաբնույթ հանդիպումներ ու աշխատանքներ են իրականացնում: Գործընթացը գնում է իր հունով, և վերջում կտան եզրակացություն: Նաև ուզում եմ նշել, որ այս փորձաքննական աշխատանքը հարուցված քրեական գործի շրջանակում է: Այսինքն՝ քննչական մարմինը հարուցված քրեական գործի շրջանակում վարձել է այս կազմակերպությանը: Բացի միջազգային այս կազմակերպությունից՝ նաև տեղական բազմաթիվ փորձագետներ են ներգրավված գործում»,- ասաց նախարարը:

Էրիկ Գրիգորյանը նաև մանրամասներ հայտնեց «Լիդիան Արմենիա»-ի ներկայացուցիչների հետ հանդիպումից: Նա ասաց, որ ընկերության ներկայացուցիչները մերժել են այդ փորձաքննական աշխատանքներին մասնակցելու առաջարկը:

«Ես անձամբ եղել եմ այդ հանդիպմանը: Վարչապետն առաջարկեց, որպեսզի համատեղ իրականացվեն այդ ուսումնասիրությունները, որ հարցերի պատասխանները տրվեն, սակայն կազմակերպության կողմից բացասական պատասխանի արժանացանք: Պատճառաբանեցին, որ իրենք ունեն այդ բոլոր լիցենզիաներն ու թույլտվությունները և իրավունք ունեն աշխատանքներ իրականացնել: Սակայն մի փոքր պարզաբանում տամ մեր փորձաքննական գործընթացի վերաբերյալ. շրջակա միջավայրի վրա ազդեցության գնահատում ինքնին պետությունը չի իրականացնում, դա իրականացնում է նախաձեռնողը, հետո դա բերվում է Բնապահպանական փորձաքննություն ՊՈԱԿ՝ եզրակացություն ստանալու: Եվ այս պահին լրացուցիչ փորձաքննությունը հնարավորություն է տալիս, որ պետությունը գնահատի՝ այդ ամբողջ աշխատանքները, որ իրականացված են, արդյո՞ք ճիշտ են»,- ասաց նա:

Մանրամասները՝ տեսանյութում:

Նարեկ Կիրակոսյան