16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Ստացվում է, որ վարչապետն ինքն է զբաղվում սփյուռքի հարցերով. Ավինյանը՝ ԼՀԿ-ի առաջարկի մասին. ՏԵՍԱՆՅՈՒԹ
Քաղաքականություն
27.03.2019 | 17:33
Փոխվարչապետ Տիգրան Ավինյանը ծանոթ չէ «Լուսավոր Հայաստան» խմբակցության կողմից առաջարկած Կառավարության կառուցվածքի փոփոխություններին, որով նախատեսվում է 14 նախարարություն, իսկ սփյուռքի ոլորտը պետք է համակարգվի փոխվարչապետի մակարդակով: «Այն փաթեթը, որը Կառավարությունն է ուղարկել Ազգային ժողով, դեռ քննարկումների փուլով կանցնի և ԼՀԿ-ի մեր գործընկերները կարող են իրենց առաջարկների մասին խոսել»,- ասաց փոխվարչապետը:
«Լուսավոր Հայաստանն» առաջարկում է ոստիկանությունը և ԱԱԾ-ն ևս դարձնել նախարարություն:
Factor.am-ը Տիգրան Ավինյանից հետաքրքրվեց՝ ինչու՞ այս իշխանությունը հետ կանգնեց ուժային կառույցները վարչապետի ենթակայությունից հանելու գաղափարից:
«Կառավարությունը որևէ մտքից հետ չի կանգնել: Կառավարության առաջարկած նախագիծն անցնելու է քննարկման բավականին լայն շրջանակ և քննարկումների ժամանակ որոշակի առաջարկություններ, հնարավոր է, ընդունվեն»,- պատասխանեց նա: Անդրադառնալով ԼՀԿ-ի առաջարկին, որ սփյուռքի հարցերով պետք է զբաղվի փոխվարչապետը, Ավինյանից հետաքրքրվեցինք՝ արդյո՞ք պետք է դրսին ցույց տալ, որ իրենց հարցերով նման բարձր պաշտոնյա է զբաղվում. «Չեմ կարծում, որ փոխվարչապետի մակարդակում դնելով՝ որևէ ստատուսի խնդիր ենք լուծում: Հանձնակատարը վարչապետի դեսպանն է լինելու և ստացվում է, որ վարչապետն ինքն է զբաղվում սփյուռքի հարցերով: Իմ գնահատմամբ՝ ստատուսն այս պարագայում ավելի բարձր է»:
Մանրամասները՝ տեսանյութում:
Նարեկ Կիրակոսյան
