10.10.2026 | 12:14
Երևանի Կենտրոնում ազոտի երկօքսիդի պարունակությունը 4 օր գերազանցել է թույլատրելի սահմանը
Հայաստանն իր գործելակերպով սահմանափակել է ներդրումների հնարավորությունները. Գագիկ Մակարյան. ՏԵՍԱՆՅՈՒԹ
Տնտեսություն
27.03.2019 | 13:21
Հայաստանը տարբեր ժամանակներում իր գործելակերպով ավելի շատ սահմանափակել է ներդրումների հնարավորությունները, քան փորձել է դրանք զարգացնել: Մարտի 27-ին լրագրողների հետ հանդիպմանն այս մասին ասաց Հայաստանի գործատուների հանրապետական միության նախագահ Գագիկ Մակարյանը:
«Այսինքն՝ տարբեր օրենքների ընդունման, միջազգային տարբեր պայմանագրերի ստորագրման ճանապարհով, կարծես, թղթի վրա փորձել են խթանել, բայց իրական կյանքում դրանք այդպես էլ չեն իրականացվել»,- հավելեց նա:
Ըստ նրա՝ Հայաստանի տարբեր կառավարությունները տարիներ շարունակ խոսել են ներդրումները խթանելու մասին, հատկապես՝ օտարերկրյա ներդրումները. «Բայց վերջին շրջանում առիթ ունեցա մի կարևոր քննարկման մասնակցելու համար ուսումնասիրել ներդրումների խոչընդոտները ու բացահայտվեցին շատ ակնհայտ խնդիրներ, որոնք տարիներ շարունակ կա՛մ չեն նկատվել, կա՛մ գիտեին՝ ուշադրություն չեն դարձրել ու չեն կարգավորել»:
Եվ հիմա, Գագիկ Մակարյանի խոսքով, երբ խոսում ենք ներդրումների խթանման մասին, պետք է կանգ առնել այդ կետերի վրա և վերացնել այդ խոչընդոտները: Գործատուների միության նախագահը խոսեց նաև օտարերկրյա ներդրումների կարևորության և դրանք ապահովելու համար անհրաժեշտ կետերի մասին:
«Եթե օտարերկրյա ներդրումներ չեն արվում պետություններում, այդ թվում՝ Հայաստանում, ապա արժեթղթերի շուկան չի զարգանում, ֆինանսավորման աղբյուրները լինում են հիմնականում բանկերը, և բանկերի դեպքում էլ ֆինանսավորման հասանելիությունը խիստ սահմանափակվում է տարբեր ոլորտների ձեռնարկությունների համար»,- թվարկեց նա:
Իսկ օտարերկրյա ներդրողին խանգարող հանգամանքներից են, ըստ Մակարյանի, պրոտեկցիոնիստական վերաբերմունքը ներքին ներդրողների նկատմամբ, ինչպես նաև իրենց շահերին վնասող գործողությունները: «Մենք տեսել ենք, թե ինչպես են դրանք արտահայտվել. կա՛մ օտարերկրյա ններդրողների հետ ուզել են փայ մտնել պետական կառույցների ներկայացուցիչները, կա՛մ իրենք ներքին որոշ արտադրողների թույլ են տվել ներմուծման կամ այլ մեթոդներով մենաշնորհատեր դառնալ և դրանով սահմանափակել ներդրումների հնարավորությունները: Այսինքն՝ մենք թղթի վրա մի բան ենք գրել, բայց իրական կյանքում այդ պրոտեկցիոնիզմը դրսևորել ենք»,- ընդգծեց Գագիկ Մակարյանը:
Մանրամասները՝ տեսանյութում:
Աղավնի Սուքիասյան
