Հիշո՞ւմ եք, որ ձեր ճակատներին արյունով գրված է Գագիկ, Յուրիկ, Արթուր․ Հրեշտակների գումարտակի նախկին հրամանատարը՝ «Ծռերին»

Այսօր «Սասնա ծռեր» խմբի անդամների գործով դատարանում հարցաքննվեցին երկու տուժողներ` Սարգիս Գրիգորյանը և Գեղամ Խաչատրյանը: Գրիգորյանն ասաց, որ ամբաստանյալներին չի ճանաչում, գործից իրեն հայտնի է այնքան, որքան հայտնի է բոլորին: Նա ասաց, որ պետության կողմից տուժող է ճանաչվել, բայց ինքն իրեն տուժող չի ճանաչում. «Մեքենաս մնացել էր գնդի տարածքում և այդ տասնհինգ օրերի ընթացքում ընդամենը մեկ կրակոց է եղել մեքենայիս ուղղությամբ, որի համար ես ինձ տուժող չեմ ճանաչում»:

Հաջորդ հարցաքննվողը Հրեշտակների գումարտակի նախկին հրամանատար Գեղամ Խաչատրյանն էր, որն ասաց, որ հիմա այլևս ոստիկանական համակարգում չի աշխատում: Խաչատրյանը դատարանին ասաց, որ գնդի գրավման ժամանակ տարածքում չի եղել, իրեն զանգահարել են, հայտնել դեպքի մասին, եկել է և սկսել ծառայությունը. «3500 ԱՄՆ դոլար, ևս 340 հազար դրամ կար չհրկիզվող պահարանում, որը գոյացել էր մեքենայի վաճառքից, երբ եկա գնդի տարածք այդ գումարը չկար»:

Նա հայտնեց, որ հետագայում այդ գումարները հայտնաբերվել են գնդի տարածքից: Տուժողը նաև հայտնեց, որ տեսել է վիրավոր ոստիկան Գագիկ Մկրտչյանին, որն արնահոսում էր: Մեծավմասամբ հարցերին տուժողը տալիս էր կարճ պատասխան՝ չեմ հիշում։

Ամբաստանյալներից Արմեն Բիլյանը տուժողից հետաքրքրվեց՝ հիշո՞ւմ է, թե ինչպես էին փողոցներում ծեծում ՀՀ քաղաքացիներին, որին ի պատասխան տուժողը ասաց․ «Իսկ դուք հիշո՞ւմ եք, որ ձեր ճակատներին կարմիր արյունով գրված է Գագիկ, Յուրիկ, Արթուր»,- ակնարկելով ՊՊԾ գնդի գրավման օրերին սպանված ոստիկաններին։

Դատարանը ստիպված եղավ ընդհատել նրանց լեզվակռիվը։

Մանրամասները՝ տեսանյութում։

Լիլիթ Շաբոյան