Ընկերությունների ողնաշարեր չեն ջարդվել, բայց մենաշնորհների դեմ պայքարում արձանագրել ենք հաջողություններ․ Փաշինյան. ՏԵՍԱՆՅՈՒԹ

Վարչապետ Նիկոլ Փաշինյանն այսօր Ազգային ժողովում ներկայացնում է Հայաստանի Հանրապետության կառավարության ծրագրի կատարման ընթացքի և արդյունքների մասին զեկույցը:

Խոսելով  երկրում մենաշնորհների վերացման մասին՝ Փաշինյանը նշեց, որ Կառավարությունը շատ է խոսել, որ մենաշնորհները պետք է ՀՀ-ից արմատախիլ արվեն և խոսելուց զատ այդ հարցում արձանագրել է նաև հաջողություններ։

«2018 թվականի մի քանի ամսվա ընթացքում շաքարավազ նեմուծող ամենախոշոր ընկերության տեսակարար կշիռը շուկայում կազմել է 78 տոկոս, նախկին 95 տոկոսի փոխարեն, բանան ներմուծող ամենախոշոր ընկերության տեսակարար կշիռը կազմել է 30 տոկոս, նախկին  57 տոկոսի փոխարեն, բենզին ներմուծող ընկերությանը՝ 29 տոկոս, նախկին 43 տոկոսի փոխարեն, իսկ դիզվառելիքի մասով  ունենք 29 տոկոս, նախկին 51 տոկոսի փոխարեն։ Այս ցուցանիշները կարևոր եմ համարում ոչ միայն այն տեսակետից, որ մրցակցային վիճակը  բարելավվել է, այլ այն տեսակետից, որ այդ վիճակը չի բարելավվել ընկերությունների  ողնաշարը ջարդելու կամ այդ ընկերությունները ջարդուփշուր անելու միջոցով։ Այդ ընկերությունները գործել են բնականոն հունով՝ միևնույն ժամանակ դաշտ է բացվել այլ ընկերությունների համար»,- ասաց  Կառավարության ղեկավարը։

Վերջինս նաև նշեց, որ միևնույն ժամանակ, երկրում սեփականության վերաբաշխման որևէ գործընթաց տեղի չի ունեցել, և այս ընթացքում որևէ մեկը չի կարող ասել, որ Կառավարությունն իր ձեռքից բիզնես է խլել և տվել այն ուրիշ մեկի։

Մանրամասները՝ տեսանյութում։

Աղավնի Սուքիասյան