13.06.2026 | 00:58
ԱԱ-2026․ Կանադան խուսափեց պարտությունից Բոսնիա և Հերցեգովինայի դեմ խաղում․ ՏԵՍԱՆՅՈՒԹ
Արարատ Միրզոյանն ընդունել է ՀՀ-ում Կուբայի դեսպանին. քննարկվել է համատեղ ծրագրերի իրականացումը՝ գիտակրթական և զբոսաշրջության ոլորտներում
Քաղաքականություն
26.03.2019 | 21:27
ՀՀ ԱԺ-ից տեղեկացնում են, որ ԱԺ նախագահ Արարատ Միրզոյանը մարտի 26-ին ընդունել է Հայաստանում Կուբայի Հանրապետության արտակարգ և լիազորդեսպան Էմիլիո Պևիդա Պուպոյին:
«Խորհրդարանի ղեկավար, շնորհավորելով դեսպանին դիվանագիտական առաքելության ստանձնման կապակցությամբ, համոզմունք է հայտնել, որ նա իր ջանքերը կներդնի հայ-կուբայական հարաբերությունների
զարգացմանն ու ամրապնդմանն ուղղված բոլոր նախաձեռնություններում:
Արարատ Միրզոյանը, նշելով, որ Հայաստանը Լատինական Ամերիկայի տարածաշրջանի մի շարք երկրների հետ ունի բավականին ակտիվ հարաբերություններ, հույս է հայտնել, որ համատեղ ջանքերի շնորհիվ Կուբայի հետ փոխգործակցությունը եւս կհասնի բարձր մակարդակի:
Երկկողմ կապերի զարգացման գործում արժեւորելով պատգամավորական բարեկամական խմբերի գործունեությունը՝ օրենսդիր մարմնիղեկավարը նշել է, որ Ազգային ժողովում արդեն ձեւավորվել է Հայաստան-Կուբա բարեկամական խումբը: Կարեւորելով միջազգային հարթակներում փոխգործակցության ակտիվացումը՝ Արարատ Միրզոյանը
նշել է, որ առկա է չօգտագործված զգալի ներուժ:
ԱԺ նախագահը շնորհակալություն է հայտնել Կուբայի իշխանություններին 1988 թ. երկրաշարժի դժվարին օրերին հայ ժողովրդին օգնության ձեռք մեկնելու համար:
Էմիլիո Պեւիդա Պուպոն, շնորհակալություն հայտնելով ընդունելության համար, վստահեցրել է, որ իր պաշտոնավարման ընթացքում կանի հնարավորը նպաստելու երկու երկրների միջեւ կապերի առավել
զարգացմանն ու խորացմանը: Դեսպանը եւս կարեւորել է խորհրդարանական դիվանագիտության դերը երկկողմ կապերի ամրապնդման հարցում:
Զրուցակիցներն անդրադարձել են տարբեր ոլորտներում համագործակցության ընդլայնման հնարավորություններին, կարեւորել համատեղ ծրագրերի իրականացումը՝ մասնավորապես գիտակրթական եւ զբոսաշրջության ոլորտներում: Կողմերը փաստել են, որ չնայած երկու երկրների միջեւ հեռավորությանը՝ առկա են բոլոր նախադրյալները
երկկողմ հարաբերությունների հետագա զարգացման համար: Հանդիպման ընթացքում զրուցակիցներն անդրադարձել են Լեռնային Ղարաբաղի հակամարտության կարգավորման հարցին, Հայոց ցեղասպանության ճանաչմանն ու Կուբայի Հանրապետության Սահմանադրության փոփոխություններին»,- ասված է հաղորդագրությունում:
